“Azərbaycan Respublikası Prezidenti cənab İlham Əliyev əsaslı şəkildə Qarabağ iqtisadi zonasında yaşayan həm erməni millətindən olan sakinlərə, həm də sülhməramlı qüvvələrə humanitar və logistik yollarını məhz Azərbaycan tərəfindən istifadəsi haqqında öz fikirlərini çatdırıb və bu daha çox Laçın sərhədində qarşı tərəfin təhlükəsizlik zəmanəti vermədiyindən və Azərbaycan sərhədçilərinə atəş açması ilə bağlıdır”.
Bu sözləri Ednews-a ehtiyatda olan polkovnik, hərbi ekspert Şair Ramaldanov deyib.
“Təhlükəsizlik zəmanəti Qarabağ zonasında mühüm rol oynayır.Digər tərəfdən Azərbaycan Respublikası Xarici İşlər Naziri də əsaslı şəkildə qırmızı xaç cəmiyyəti üçün humanitar yükləri daşımağa Bərdədən cəmi 70 km keçməklə Ağdam yolu ilə Xankəndinə daxil olmasını məqsədəuyğun hesab etmişdi. Çünki Yerəvandan Xankəndiyə 330 kmdi, ancaq Bərdədən Xankəndiyə 71 kmdir. Digər tərəfdən, Rusiyanın da, sülhməramlıların təminatı ilə bağlı yüklərin daşınması, Rusiyadan gələn logistik yollar ilə məhz Azərbaycan ərazisindən keçərək bu təminatın yolunu xeyli qısaltmış olurlar. Əlbətta təhlükəsizlik zəmanəti də burada mühüm rol oynayır, çünki Ermənistanda gedən proseslər, sərhədin hələ də demarkasiya olunmaması, hələdə sülh müqaviləsinin olmaması və yol çəkilməməsi bu istiqamətdə yerləşən Laçın dəhlizini təhlükəsiz ərazi adlandırmaq olmaz.”
Hərbi ekspert qeyd etdi ki, bununla bağlı qərarı Azərbaycan dövləti verəcək və hər halda, humanitar yükün Azərbaycana keçirilməsi Azərbaycan qanunlarına uyğun olaraq həyata keçiriləcək.
“Digər tərəfdən də, əlbəttə, oradan keçə biləcək hansısa arzuolunmaz şəxslər və yüklər sərhəd keçid məntəqəsi olandan sonra nəzarət altında olacaq. Növbəti təxribat humanitar adı altında 400 ton yükün məhz Ermənistandan Laçın dəhlizi ilə yenə də Azərbaycan ərazisinə keçməsi və oradan Xankəndiyə göndərilməsi ilə bağlı bir addım atılıb. Bu bəzi məlumatlara görə 19 maşın edir. Düşünürəm ki, bununla bağlı qərarı Azərbaycan dövləti verəcək. Hər halda, bir qərar qəbul edilsə, burada birinci növbədə Azərbaycan maraqları üstün tutulacaq. Əgər belə bir razılıq olsa ki, yüklər məhz həmin ərazidən keçsin, düşünürəm ki, dövlət sərhəd xidməti bütün yükləri beynəlxalq qanun çərçivəsində, sərhəd keçid mexanizmlərinə uyğun olaraq Azərbaycan ərazisinə keçməyə icazə verəcək. Bu addım Azərbaycanın yüklərin məhz humanitar yük olmasına əmin olması məqsədi ilə atılan addımdır.”
Nurlana Hacıyeva
