Xəbər verdiyimiz kimi, avqustun 23-də Azərbaycan Respublikasının Prezidenti İlham Əliyev, birinci xanım Mehriban Əliyeva və Özbəkistan Respublikasının Prezidenti Şavkat Mirziyoyev, xanımı Ziroatxon Mirziyoyeva Füzulidə inşa olunan Mirzə Uluqbəy adına 1 nömrəli tam orta məktəbin açılış mərasimində iştirak ediblər.
Bu barədə Ednews-a şərh bildirən Beynəlxalq Avrasiya Mətbuat Fondunun prezidenti Umud Mirzəyevin sözlərinə görə, Qardaşın qardaşa dəstəyi lazım olanda dəvət gözləməz. Bu da qardaşlığın ən yüksək nümunəsidir. Özbəkistan bunu ən gözəl şəkildə sərgilədi.
“Füzulidə inşa olunan məktəb Azərbaycanın böyük məktəblərindən biri olacaq. Belə bir məktəb Daşkənddə də var. Sevindirici haldır ki, Qarabağın bərpası işlərində qardaş Özbəkistan dövləti də yaxından iştirak edir. Füzuli şəhərində Özbəkistan hökuməti tərəfindən hədiyyə olaraq orta məktəb inşa olunur. Bu olduqca mühüm, sevindirici hadisədir. Bu tarixi hadisə Azərbaycan və Özbəkistan arasında dostluq, qardaşlıq münasibətlərini daha da möhkəmləndirəcək. 44 günlük vətən müharibəsi bitdikdən sonra işğaldan azad edilən torpaqlarımızda həyat yenidən, yavaş-yavaş geri qayıdır. Bu günkü gün də Azərbaycan üçün mühüm, tarixi günlərdən biridir. İkitərəfli münasibətlərin inkişafında dövlət başçılarının səfərləri xüsusilə böyük əhəmiyyətə malikdir. Bu baxımdan Ümummilli lider Heydər Əliyevin, həmçinin Azərbaycan Respublikasının Prezidenti İlham Əliyevin varislik prinsipləri əsasında həyata keçirdiyi siyasət iki ölkə arasında münasibətlərin daha da genişləndirilməsini şərtləndirir”.
U.Mirzəyev qeyd etdi ki, Özbəkistan Prezidenti Şavkat Mirziyoyevin “Azərbaycan bizim üçün yaxın dost və zamanın sınağından çıxmış etibarlı strateji tərəfdaşdır” sözlərinin təsdiqi olan bu məktəbin inşası qardaş ölkələrimiz arasında münasibətlərin yüksək səviyyəsindən xəbər verir:
“Azərbaycan və Özbəkistan liderlərinin siyasi iradəsinin nəticəsində ölkələrimiz arasında münasibətlər də inkişaf etdirilib, yüksəs səviyyəyə çatdırılıb və bundan sonra da daha da zirvələrə qalxacaq. İnanıram ki, Füzulidə tikilən Mirzə Uluqbəy adına 1 nömrəli tam orta məktəb Füzulilər, Nəsimilər, Nizami Gəncəvilər yetişdirəcək. Özbəkistan dövləti ilə əməkdaşlıq həm ölkələrimizin və xalqlarımızın, həm də bütün Türk dünyasının inkişafına əhəmiyyətli töhfələr verəcək. Düşünürəm ki, Füzulidə inşa edilən məktəbi bir ocağa çevirməliyik. Həm də türkdilli ziyalıların dünyasının görüş məkanına çevirə bilərik. İnanıram ki, bundan sonra da sevindirici, xeyirli xəbərlər eşidəcəyik”.
Xatırladaq ki, ötən il başlanılan tikinti işlərinin bu ilin dekabrında başa çatdırılması planlaşdırılır. Üç hektar ərazidə inşa edilən məktəb binası iki mərtəbə və zirzəmidən ibarətdir. Məktəbdə 40 sinif otağı, 6 laboratoriya, 2 informatika otağı, 5 funksional tədris otağı, akt zalı, idman zalı, yeməkxana, kitabxana yaradılacaq. Məktəbin ərazisində futbol meydançası, istirahət və keçiriləcək tədbirlər üçün yerlər, qaçış zolaqları, nəzarət-buraxılış məntəqəsi, qazanxana, su çənləri, transformator yarımstansiyası inşa ediləcək.
Oğuz