“Bu gün Azərbaycanın sülh çağırışlarına baxmayaraq super güclərin “dəstəyi” ilə hələ də Qarabağda barış bərqərar olmayıb. Artıq heç kimə sirr deyil ki, sülh prosesini gecikdirənlər ilə vaxtilə münaqişəni alovlandıranlar eyni qüvvələrdir”.
Bu sözləri Ednews-a Beynəlxalq Avrasiya Mətbuat Fondun prezidenti Umud Mirzəyev bildirib. Onun sözlərinə görə, bu gün dünyanın qaynar nöqtələrində cərəyan edən bütün bu proseslər böyük dövlətlərin maraqları ilə nizamlanır:
“Uzun illərdir davam edən münaqişlərin taleyi böyük dövlətlərin mənafelərindən və maraqlarından asılı qalmaqla yanaşı onların “humanitar” bayraqları altında idarə olunmaqdadır. Cənubi Qafqazda – Qarabağda baş verənlər də bu analoji siyasətlərin nəticəsidir. Əgər belə olmasaydı dünyanın supergüclərinin təmsil olunduğu ATƏT-in Minsk Qrupunun fəaliyyəti bu qədər səmərəsiz olmazdı. Ötən otuz il ərzində Fransa tərəfi həyasızcasına işgalcı Ermənistanın mövqeyindən cıxış etdi, Rusiya və Amerika da dolayısı ilə münaqişənin uzanmasına “dəstək” oldu. Müxtəlif vaxtlarda qəbul olunan cəfəngiyat qətnamələr, erməni diasporasının səsləndirdiyi saxta faktlar, böyük güclərin yaydığı əsassız bəyanatlar Qarabağ münaqişəsinin uzanmasına və regionun qaynar nöqtələrdən biri kimi qalması ilə nəticələnmişdi. İlk ağıla gələn isə vaxtilə erməni lobbisinin təşəbbüsü ilə ABŞ Konqresi tərəfindən Azərbaycana ABŞ-ın birbaşa dövlət yardımını qadağan edən 907 saylı düzəlişi olur. İşğala məruz qalan biz, təcavüz olunan biz”.
U.Mirzəyev həmçinin qeyd edib ki, torpaqları, yurd-yuvası talan edilən öldürülən, yandırılan, deport olunan azərbaycanlıların haqları qorunmaqdansa, dünya ədaləti tərəfindən həm ittiham olundu, həm də sanksiyalara məruz qaldı.
“Poradaksaldır, deyilmi? Yadıma 2000-ci illərin ortalarında ABŞ Dövlət Departamentində keçirdiyim görüşlərin birində səsləndirdiyim fikirlər düşür. Ötən əsrin 80-ci illərində Azərbaycan xalqı müstəqillik üçün mücadilə apararkən ABŞ-ı demokratiyanın beşiyi, ədalət keşikçisi kimi özünə örnək hesab edirdi. Ancaq, Qarabağ işğal olunduqdan sonra Amerikanın bu proseslərə rəvac verən və münaqişəni daha da kəskinləşdirməyə çalışan super güclərin başında olduğunu gördük. Torpaqlarımız işğaldan azad olduqdan sonra da nə insan haqlarının, nə demokratiyanın, nə də sülhün Birləşmiş Ştatlar maraqlarına daxil olmadığı təsdiqlənmiş oldu. Son olaraq isə bu günlərdə seperatçı rejimin keçirdiyi saxta seçkilərə xala xətrin qalmasın reaksiyası da ABŞ üçün müqəddəs maraqlardan kənar heç nəyin olmadığını bir daha sübut etdi. Maraqlar olan yerdə isə ədalətdən, sülhdən, barışdan danışmağın heç bir əhəmiyyəti yoxdur. Missiyası barış olan bir Vətəndaş Cəmiyyəti Təşkilatı təmsilçisi olaraq çox istərdik ki, böyük dövlətlər öz siyasətlərini sülh üzərində qursunlar və insanların rifahı ücün çalışsınlar. Konfliktlərə ədalətli yanaşsınlar və mübahisələrin, münaqişələrin yalnız danışıq yolu ilə həllini düşünsünlər. Bu gün Azərbaycan insanı 30 illik işğaldan, zülmdən sonra belə barış istəyir. Yetər, bizim olanları bizdən almaq istəyənlərə dəstək oldunuz. Bir daha supergüclərin rəhbərlərinə, dünya ictimaiyyətinə, beynəlxalq təşkilatlara səslənir və sülh üçün yalnız ədalətli addımlar atmağa çağırırıq. Azərbaycanda, bizim regionda da əmin-amanlığın təmin olunmasının yolu ədalətli yanaşmadan keçir”.
Oğuz