“Ermənilərin köçü artıq 30 minə yaxınlaşır. Bu o deməkdir ki, əhalinin yarısı köçür. Xocavənd və digər kəndlər boşalır. Burada 2 məqsəd ola bilər. Azərbaycan tərəfi onlara vətəndaşlıq da təklif edir, hətta köməklik də göstərir. Ərzaq, humanitar yardım, partlayışdan sonra dərman-dava da yollayırlar. Buna baxmayaraq onlar köçə davam edirlər. Erməni camaatı ola bilsin ki, azərbaycanlılardan qorxub köçür, qalanı da küyə düşür. Hamı qaçır, mən də qaçım deyərək gedirlər. Getmələrinə digər səbəb isə hansısa görünməyən qüvvədir ki, onları təhrik edirlər. Çox güman ki, Ermənistan hakimiyyəti Azərbaycan qarşı etnik təmizləmə, deportasiya kimi ittihamları səsləndirəcəklər”. 

Bu sözləri Ednews-a politoloq Zərdüşt Əlizadə deyib. Onun sözlərinə görə, Azərbaycan hökuməti erməni sakinlərə hər cür təminatı verir:

“Hazırda iki xalqın da bir-birinə inamı, etimadı yoxdur. Çünki uzun illərdir müharibə şəraitində yaşamışıq, savaşlar baş verib, ölənlər, yaralananlar olub. Mövcud vəziyyəti düzəltmək üçün müəyyən addımlar atılmalıdır. Əlbəttə, hökumətdən çox şey asılıdır. Hökumətimiz düzgün siyasət yürüdür. Prezident çıxışında ermənilərə çağırışlar edir, onlara qarşı heç bir təhqiredici sözdən, yanaşmadan istifadə olunmur. Hər dəfə erməni sakinlərə vətəndaşlıqla bağlı normal çağırışlar edilir, onların bütün hüquqlarının təmin olunacağı deyilir. Əlbəttə, kimsə israrla yaşamaq istəmirsə, yol açıqdır, onu zorla Qarabağda saxlayası deyilik. Getmək istəyənlərə də şərait yaradılır, Ermənistandan göndərilmiş avtobuslara oturaraq torpaqlarımızı tərk edirlər. Gedən ermənilərə jurnalistlər suallar ünvanlayırlar və çoxları cavab verir. Özləri etiraf edirlər ki, könüllü gedirlər, onları kimsə məcbur etmir, qovmur, zorla göndərmir. Bu cür etiraflar mühümdür”. 

Politoloq BBC-nin Ermənistanın sərhədə ən yaxın Qoris şəhərindən hazırladığı təxribatdolu reportaja da münasibət bildirib:

“BBC-nin birinci reportajları qərəzli idi. Azərbaycanın tarixdə yaşadıqlarını ətraflı yayımlamamışdılar, amma ikinci reportajda səhvlərini düzəltdilər. Görünür, onlara izah edilib. Reportajda Birinci Qarabağ müharibəsində deportasiya edilən azərbaycanlılar haqda danışıldı. Hətta köçkünlərin arasından bir nəfəri də danışdırmışdılar. BBC çalışır ki, tərəfsiz, neytral görünsün”.

Oğuz