Son zamanlar dünyada baş verən hadisələr, geosiyasi reallıqlar, kütləvi etirazlar, iqtisadi böhranlar bəşəriyyəti naməlum tunelə doğru aparır. Bir yanda HƏMAS-İsrail, digər yanda Ukrayna-Rusiya müharibələrinin gedişatı III Dünya Müharibəsini gətirib çıxara bilərmi?
Ednews bu barədə tanınmış ictimai şəxslərin fikirlərini öyrənib. Cavabları təqdim edirik.
Millət vəkili Etibar Əliyev:
“III Dünya Müharibəsi demək olar ki, başlayıb. İsrail-Fələstin müharibəsi də bunun bariz nümunələrindəndir. Dünya müharibələrinə miqyasına görə qarışısına rəqəmlər qoyurlar. Hər halda qeyd etdiyim müharibə çox geniş miqyas ala bilər. İranda sərhədə qoşun yığır. Bəzi mənbələrdə deyilir ki, İran Fələstini silahla təmin edir. Bu barədə tarixçilər də sözünü deməlidir. HƏMAS İsrailə qarşı müharibə açıb. Ancaq görsənir ki, bu elə də sadə müharibə deyil. Düşünürəm ki, əvvəlki müharibələrə baxanda miqyasına görə İsrail-Fələstin müharibəsi böyükdür. Hər halda gözləyək görək nələr olacaq”.
Millət vəkili Fazil Mustafa:
"Xeyr. İmkansız. Lokal müharibələrdir. Necə deyərlər, nəzarət olunan müharibələr. Dünya ziddiyətlərin o həddinə hələ gəlməyib".
Politoloq Fikrət Sadıqov:
“Elə III Dünya Müharibəsinin başlanmasının simptomları göz qabağındadır. Artıq bir çox regionlarında müharibə gedir, toqquşmalar var. İsrail və Fələstin dövlətlərini dəstəkləyən, tənqid edən qüvvələr var. Eyni zamanda Ukrayna-Rusiyanı da nəzərdə tuturam. Burada da döyüşlər pik vəziyyətə çatıb. Azərbaycan Ermənistanla üzləşib və onun havadarları da əllərindən gələni edirlər ki, Cənubi Qafqazda sülh yaranmasın. Real mənzərə budur. Əgər vaxtı ilə bir sıra koalisiyalar təşkil olunurdusa, bir-biri ilə vuruşurdusa, indi bu müharibələrin xüsusiyyətləri, xarakterləri dəyişib”.
Azad Vətən Partiyasının sədri Akif Nağı:
“Dünyada yeni düzənin formalaşması prosesi gedir. Qüvvələr nisbəti dəyişir, yeni güc mərkəzləri yaranır. Üçüncü Dünya Müharibəsi faktiki olaraq gedir. Müharibə tərəfləri öz ərazilərində deyil, başqalarının torpaqlarında savaşa üstünlük verir”.
Politoloq Zərdüşt Əlizadə:
“III Dünya müharibəsi mümkün deyil. Niyə? Ona görə ki, nüvə dövlətləri arasında müharibə baş versə və adi silahlardan istifadə etməklə bir tərəf digər tərəfə üstün gəlsə, bu zaman uduzan tərəf nüvə silahı tətbiq edəcək. Sözsüz ki, qarşıdakı dövlət də eyni addım atacaq. Bundan sonra nə olacaq? Adi silahlarla gedən müharibə dönüb olacaq nüvə-raket müharibəsi. Bunun da nəticəsində bəşəriyyət məhv olacaq. İstər Hind-Sakit okean regionunda, istər Yaxın Şərqdə, istərsə də Cənubi Qafqazda III Dünya müharibəsinin başlama ehtimalı sıfıra bərabərdir.
Əgər dövlətlər və insanlar məhv olmaq istəmirlərsə, dünya müharibəsi olmayacaq. Yox, əgər hansısa başdanxarab nüvə silahının düyməsini basarsa, raketlər uçar, bombalar partalayar və Yer kürəsi məhv ola bilər. Bu halda kimin yarım saat gec və ya tez ölməsinin əhəmiyyəti qalmayacaq”.
Oğuz