Prezidentin köməkçisi Hikmət Hacıyev Zəngəzur dəhlizinin Azərbaycan üçün cəlbediciliyini itirdiyini bildirdi. Ardınca Ermənistan Baş naziri Nikol Paşinyan açıqlama verdi ki, yol açıldıqdan sonra Azərbaycan üçün keçid prosedurlarını sadələşdirə bilərlər. Hesab etmək olarmı ki, İrəvan yola gəlir?

Bu barədə Ednews-a politoloq Oqtay Qasımov bildirdi ki, Paşinyanın dedikləri pozitiv görünsə də, yenə də fikirlərinin konstruktiv olmadığı düşüncəsindəyəm: 

“Əlbəttə, onun təqdim etdiyi xəritə Azərbaycanın ərazi bütövlüyünü tanıdığını ehtiva etsə də, nəqliyyat xətləri ilə bağlı göstərdiyi istiqamətlər bu məsələdə konstruktiv olmadığını göstərir. Söhbət Zəngəzur dəhlizi və ya bölgədə açılacaq nəqliyyat xətlərindən gedir. Ermənistan 10 noyabr bəyanatı əsasında Zəngəzur üzərindən Azərbaycanın Qərb rayonları ilə Naxçıvan arasında yolların açılmasına razılıq vermişdi. Bu çərçivədə vətəndaşlarımızın maneəsiz və təhlükəsiz hərəkətinə təminat verməli idi. Keçid üçün həm avtomobil, həm də dəmir yolları açılmalıydı. Təxminən 35 il əvvələ qədər bölgədə həm dəmir, həm də avtomobil yolları işlək olub”.

Politoloq qeyd etdi ki, Ermənistan bizə yalnız Mehridən keçən dəmir yolu təklif edir:

“Avtomobil yolunun isə Gorus üzərindən (Laçın istiqamətindən) açılması təklifini verir. Başqa bir təklifi isə Kəlbəcər istiqamətindədir. Üçüncü yolu isə Qazax istiqamətindən. Təsəvvür edin ki, bizə 42 kilometrlik yolu kənara qoyub, 100-300 kilometrlik yoldan istifadəni təklif edir. Qeyri-ciddi və irrasional təkliflərdir. Bunu Paşinyanın növbəti nağılı kimi dəyərləndirirəm”.

Oğuz