"Azərbaycanın müstəqil siyasət yeritməsi, regionun əsas gücü kimi möhkəmlənməsi Qərbi narahat edir. 44 günlük Vətən müharibəsindən sonra Cənubi Qafqaz regionunda yeni yaranan reallıqlar bəzi imperialist qüvvələrin maraqlarına cavab vermir".
Bu fikirləri Ednews-a millət vəkili Könül Nurullayeva deyib. Onun sözlərinə görə, bu xüsusda biz yenidən Qərbin ənənəvi riyakarlığını, anti-Azərbaycan, türkofob, islamafob siyasətinin davam etdiyini görürük:
"Müasir dünyada neokolonializm siyasətindən çıxış edən Qərb müxtəlif regionlarda münaqişələrin və fəlakətlərin əsas səbəbkarıdır. Demokratiya, insan hüquqları adı altında ölkələrin daxili işlərinə müdaxilə olunur, idarəolunan xaos yaradılır. Təbii ki, əsas məqsəd ayrı-ayrı ölkələrin iqtisadiyyatının və təbii sərvətlərinin ələ keçirilməsi, xalqların ağır sosial duruma salınmasıdır. Biz bunu İraqın, Liviyanın, Tunisin, Misirin, Suriyanın timsalında daha qabarıq şəkildə şahidi olmuşuq. Adıçəkilən ölkələrdə insan hüquqlarından danışan Qərb ölkələrinin daxilində baş verən proseslər - xaos, vətəndaş qarşıdurması - əsl mahiyyəti açmağa imkan verir. “Ərəb baharı”ndan sonra əslində xalqlar sabitliyin nə qədər vacib faktor olduğunu daha dərindən anladı. Eyni zamanda aydın oldu ki, Qərbsayağı demokratiyanın zorla sırınması səbəbsiz deyil.
Kənardan ixrac olunan inqilabların xalqlara və ölkələrə fəlakət gətirdiyi gün kimi aydındır. Miqrantlara qarşı dözümsüzlük siyasəti, onlarla qeyri-insani davranışlar, Avropada rasizmin güclənməsi və genişlənməsi insan haqları və demokratiyanın sadəcə gözdən pərdə asmaq üçün bəhanə olduğunu təsdiqləyir".
Deputat xanım bildirdi ki, digər ölkələrdə olduğu kimi, Azərbaycanda da milli-mənəvi dəyərlərimizə zidd olan zərərli dəyərləri aşılamaq, təbliğ etmək Qərbin istismarçı siyasətinin tərkib hissəsidir:
"Cinsi azlıqlar üçün hüquqlar tələb olunması, aksiyalarının təşkil edilməsi, eyni cinslilərin ailə qurması məsələsinin orta məktəb dərsliyinə daxil edilməsinə dair cəhdlər də bu iyrənc siyasətdən qaynaqlanır.
Azərbaycan xalqı əsrlər boyu öz milli-mənəvi dəyərlərini, milli kimliyini qoruyub saxlayıb. Xalqımız bundan sonra da heç bir gücün bu dəyərləri sarsıtmasına, zədələməsinə imkan verməyəcək".
Oğuz
