Artıq uzun müddətdir ki, Ukraynada müharibə vəziyyəti eyni şəkildə qalıb. Qərb dövlətləri Ukraynaya hərbi yardımın həcmini azladıb və bu ölkənin Rusiyaya qarşı əks-hücum əməliyyatlarına ciddi təsir göstərməkdədir.
Bu müharibənin sonu üçün bir işarə ola bilərmi?
Məsələ ilə bağlı Ednews-a danışan Avropa Şurası Parlament Assambleyasının vitse-prezidenti, Ukrayna Ali Radasının Xarici siyasət və parlamentlərarası əməkdaşlıq məsələləri Komitəsinin sədri Aleksandr Merejko pərdə arxasında baş verənlərin qlobal mediada paylaşılandan çox daha fərqli olduğunu bildirib:
“Ukraynada müharibə stabil vəziyyətdə qalmır. Qlobal mediada müharibənin hər nə qədər dəyişməz şəkildə qalması barədə xəbərlər yayılsa da, cəbhə arxasında genişmiqyaslı işlər aparılır. Müvəqqəti yubanmalara baxmayaraq, Qərbin Ukraynaya dəstəyi heç vaxt tamamilə dayana bilməz. Bunu qeyd etmək vacibdir ki, ABŞ və Avropa siyasi liderləri Ukraynanı öz təhlükəsizliklərini və beynəlxalq hüquq nizamını qorumaq uğruna qorumalıdırlar”.
Ukraynanın Rusiya şərtlərini qəbul etmək ehtimalı nədir sualına deputat müharibənin Ukrayna işğal edilmiş hər bir ərazisini geri qaytarmayınca bitməyəcəyini bildirib:
“Əlbəttə ki, biz uzunmüddətli müharibəyə hazır olmalıyıq. Belə görünür ki, Ukrayna buna Rusiyadan daha hazırdır. Lakin, müharibə qəfil və gözlənilmədən bitə bilər. Putinin seçkilərdən öncə rus elitası tərəfindən hakimiyyətdən uzaqlaşdırılması buna səbəb ola bilər. Strateji baxımdan Rusiya artıq müharibədə məğlub olub. Rusiyanın əvvəlki nüfuzu qalmayıb və ölkənin ən az növbəti 50 ili müharibənin vurduğu zərərlərindən təsirlənərək keçəcək. Siyasi arenada Rusiyaya qarşı etibarsızlıq yaranacaq və ölkə bir çox qlobal tədbirlərdən uzaq qalacaq. Siyasi nüfuzdan başqa ölkənin iqtisadi vəziyyəti onun xalqının yaşam səviyyəsinə ciddi anlamda təsir edəcək. Biz ukraynalılar öz vətənimizi qoruduğumuz üçün mübarizə apardığımızın fərqindəyik və bu hər zaman bizim əsas motivasiyamız olacaqdır. Bunun əksinə ruslar hələ uzun müddət bu lazımsız savaşın haqsız tərəfi olmaqdan utanacaq və öz dövlətlərinə olan güvənləri haqda bir daha düşünməli olacaqlar.
Savaş sadəcə Ukrayna bütün torpaqlarını geri qaytardıqdan sonra bitə bilər. Növbəti il Ukrayna Aİ və NATO-ya qoşulmaq üçün Qərblə danışıqlara başlayacaq. NATO-nun Vaşinqtonda keçiriləcək 2024-cü il sammitində böyük ehtimal ki, Ukrayna NATO-ya qoşulmaq üçün təklif alacaq”.
Fərid Axund
