"Avropa İttifaqının xarici əlaqələr və təhlükəsizlik siyasəti üzrə ali nümayəndəsi, Aİ Komissiyasının vitse-prezidenti Jozep Borrelin təxribatçı mövqeyinə ən tutarlı cavabı Prezident İlham Əliyev verdi. 30 ölkəni təmsil edən 60 xarici ekspertin iştirakı ilə keçirilən “Qarabağ: 30 ildən sonra evə dönüş. Nailiyyətlər və çətinliklər” Forumunda dövlət başçımız bəyan etdi ki, hətta ermənilərin özləri etiraf edirlər ki, təcrübəli Avropa diplomatı - Jozep Borrel yalan danışır. Yəni, ermənilər Qarabağı 100 min insanın tərk etdiyini iddia etdiyi halda J.Borrel rəqəmləri süni şəkildə şişirdərək 150 min insanın “hüquqlarının pozulmasından” gileylənir".
Bu sözləri Ednews-a millət vəkili Könül Nurullayeva deyib.
"Prezident İlham Əliyevin də söylədiyi kimi, bu, təkcə rəqəmlərlə bağlı manipulyasiya deyil, bu, Azərbaycana qarşı əsassız ittihamlardır. Təbii ki, Borrel kimi diplomatlar buna görə məsuliyyət daşıyır. Borrelin ölkəsi separatçılıqdan əziyyət çəkməsinə rəğmən onun separatçıları dəstəkləməsi absurddur.
Rəsmi Bakının mövqeyi bundan ibarətdir ki, Borrel və Metsola kimi şəxslərin mövqeyi Avropa İttifaqının maraqları ilə ziddiyyət təşkil edir. Bu qərəzli yanaşma Avropa İttifaqı ilə Azərbaycan arasında qurulan qarşılıqlı əməkdaşlığı gözardı etməkdir. Prezident İlham Əliyev beynəlxalq Qarabağ Forumunda haqlı olaraq Avropa Parlamentini bir təsisat kimi “məsuliyyətsiz insanlar qrupu” adlandırdı. Həqiqətən də ermənipərəst avroparlamentarilərin anti-Azərbaycan mövqeyi ikrah hissi yaradır. Azərbaycana qarşı 10-dan çox qərəzli qətnamə qəbul edənlərin həm də korporativ maraqlar naminə bu addımları atması heç kimə sirr deyil.
Aİ Komissiyasının vitse-prezidenti Jozep Borrelin Azərbaycana qarşı əsas təhdid mənbəyi olan və antiterror tədbirlərini şərtləndirən Ermənistan silahlı qüvvələrinin Azərbaycan ərazisində qeyri-qanuni mövcudluğu məsələsinə laqeyd yanaşması ölkəmizə qarşı açıq qərəzin nümunəsidir".
Millət vəkili qeyd etdi ki, 30 illik işğal dövründə hüquqları pozulmuş azərbaycanlıların problemini görməzdən gələn Avropa İttifaqına yaxşı məlumdur ki, Azərbaycanın işğaldan azad olunmuş ərazilərindən gedən ermənilərin 15 000 nəfəri Ermənistan ordusunun heyət üzvləri idi:
"Rəsmi Bakı haqlı olaraq, Jozep Borrelin bu kimi yanlış bəyanatlarını Aİ-nin vasitəçilik səylərinə və Aİ Şurasının Prezidenti Şarl Mişelin bu istiqamətdə missiyasına xələl gətirən faktor kimi dəyərləndirir. Beynəlxalq Forumda dövlət başçımız da bəyan etdi ki, Azərbaycan Avropa İttifaqının doqquz üzvü- yəni Aİ-nin üçdəbiri ilə strateji tərəfdaşdır. Azərbaycan Şarl Mişelin səylərini hər zaman dəstəkləyib ki, Ermənistan-Azərbaycan münaqişəsinə son qoyulsun. Məhz Ş.Mişel tərəfindən Brüsseldə bir neçə görüş təşkil edilib. Dövlət başçımız bəyan etdi ki, hazırda mümkün yeni görüş müzakirə olunur. Bu mənada Aİ rəsmilərinin təhrikçi və təxribatçı bəyanatlarına son qoyulmalıdır".
Oğuz
