Artıq böyük ehtimalla demək olar ki, ilin sonunadək Bakı və İrəvan arasında sülh müqaviləsinin imzalanması mümkün olmayacaq. Hər halda bundan ötrü gərəkən diplomatik fəallıq gözə dəymir. Eyni zamanda erməni mətbuatında Paşinyanın növbədənkənar seçkilərə gedəcəyi ilə bağlı məsələlər də dolaşır.
Bəs diplomatik fəallığın olmaması nəyə görədir? Paşinyan növbədənkənar seçkilərə gedə bilərmi?
Qafqaz Siyasi Analiz Mərkəzinin direktoru Əhməd Əlili Ednews – a açıqlamasında, mövcud şəraitdən dolayı olaraq fəallığın mart ayının ortalarında ola biləcəyi ehtimalını irəli sürüb.
“Azərbaycan və Ermənistan arasında olan birgə bəyanat, beynəlxalq ictimaiyyətdə məsələ ilə bağlı pozitiv gözləntiləri olan azlığın, aclığını doydurmuş oldu. Məsələ ondan ibarətdir ki, sentyabr hadisələrindən sonra həm Vaşinqtonda, həm Brüsseldə, həm də Moskvada çalışırdılar ki, bu istiqamətdə müəyyən inkişaf olsun. Lakin bununla bağlı uzun müddətdir inkişaf cərayan etmirdi. Birdən – birə Azərbaycan və Ermənistan birgə bəyanat qəbul etdi. Bu kontekstdə, hesab edirəm ki, bəyanatın dəyəri mediada şok effekti, faktiki olaraq sülh müqaviləsinə yaxın bir informasiya fonu yaratdı. Əlbəttə yəni, sülh müqaviləsi tamam ayrı bir məsələdir. İnformasiya fonuna verilən reaksiyalara baxdıqda, Vaşinqtonda, Brüsseldə və Türkiyədə də kifayət qədər pozitiv bəyanatlar verildi. Ona görə də, sülh müqaviləsi bir qədər gec imzalansa da, beynəlxalq mediatorlar artıq özlərini müəyyən bir uğura nail olmuş tərəf kimi görürlər. Hesab edirəm ki, faktiki olaraq bugündən etibarən Avropada, müəyyən bayram sezonu başlayır. Milad Bayramı, Yeni İl, daha sonradan yanvar ayının əvvəlində Ermənistanda Milad Bayramı keçiriləcək və bundan sonra da Azərbaycanda keçiriləcək seçkiyə 1 ay qalmış bir müddətə girmiş olacağıq. Bu o, deməkdir ki, sülh müqaviləsinin bağlanması ilə bağlı proseslərə seçkilərdən sonra, martın ortalarına qədər olan dönəmdə gözləmək olar”.
Siyasi ekspert Ermənistanda növbədənkənar seçkilər ehtimalını isə olduqca zəif qiymətləndirsə də, bunun hər zaman ola biləcəyi ehtimalına da toxunub.
“Doğrudur, mətbuatda Ermənistanda növbədənkənar seçkilərin keçirilməsi ilə bağlı fikirlər gəzir. Çox vaxt bunu onunla əlaqələndirirlər ki, yeni parlament lazımdır ki, Ermənistanda baş nazirin imzaladığı sülh müqaviləsini ona ratifikasıya edilsin. Əslində reallığa qaldıqda parlamentdə tam üstünlük Paşinyan tərəfdarlarındadır. Lakin istisna etmirəm ki, sülh müqaviləsi imzalandıqdan dərhal sonra, Paşinyan özünü çox rahat hesab edə bilər. Xatırladım ki, 2021 – ci il seçkilərində, 2018 – ci il seçkilərindən fərqli olaraq mövqeyi zəifləmişdi. Müqavilənin imzalanması ona elə bir şərait yaradacaqdır ki, “Qarabağı itirsək də əvəzində Azərbaycan və Türkiyə ilə iqtisadi münasibətlər qazandıq” – ifadəsini işlədə bilsin. Bu isə əlbəttə ki, düşünmürəm, Ermənistan cəmiyyəti arasında ona mühüm dəstək qazandırsın. İndiki şəraitdə isə qeyd etdiyim ki, Paşinyanın sülh müqaviləsini ratifikasiya edə bilmək üçün kifayət qədər üstünlüyə malikdir. Paşinyan və onun ətrafında baş verən proseslər də müəyyən qədər maraqlıdır. Bəlli deyil ki, bir müddətdən sonra Paşinyan komandasının daxilində hansı dəyişikliklər olsun. Mümkündür ki, bu cür reallıqlarda müəyyən dəyişikliyə gedilsin, lakin hazırda o, real görülmür”.
Əkbər Novruz
