Bu gün Ermənistan parlamenti təcili iclas keçirəcək, Azərbaycanla sərhədin delimitasiyası müzakirə olunacaq. Ermənistanın şərti sərhəddə canlı qüvvə və texnika yığması da diqqətdən yayınmır, ermənilərin könüllü silahlı birləşmələri də sərhədə axışırlar. Belə olan halda, bölgədəki mövcud gərginlik Azərbaycanla Ermənistan arasında hərbi toqquşmalarla müşayiət oluna bilərmi?
Mövzu ilə bağlı Ednews-a açıqlamasında Beynəlxalq Avrasiya Mətbuat Fondunun prezidenti Umud Mirzəyev şərh bildirib. Onun sözlərinə görə, proseslər onu deməyə əsas verir ki, Ermənistana növbəti dəfə tərs şapalağın vurulmasına ehtiyac var:
“Azərbaycanın boşaldılması zəruri olan kəndləri var. Ermənistan tərəfi, eyni zamanda orda məskunlaşan erməni sakinləri də bu gerçəyi etiraf edirlər. Bu da erməni məntiqidir. Onlar uydurma, cəfəng, özlərinə yarıya biləcək tərcümeyi-hal formalaşdırırlar. Bu mənada sülh sazişinə, kapitulyasiya aktına qədər Ermənistanın rədd etdiyi məsələlər var. Azərbaycan və Naxçıvan torpaqlarının Zəngəzur vasitəsilə birləşməsi məsələsi də həllini tapmayıb. Bunlar öz həllini tapmalıdır. Ermənistanın bu gün aktivləşməsi ona havadarlıq edən qüvvələrin vasitəsilə təşəkkül tapıb. İstər Avropada olan görüşlər, istər bəzi ölkələrin nümayəndələrinin Ermənistana səfərləri, ordakı separatçı qüvvələri hərəkətə gətirməkdədir. Həyata keçirilən proseslər barışa, sülhə aparmır, əksinə konfiliktin olma ehtimalını, mühribənin yenidən alovlanması ehtimalını atırır. Bu mənada Azərbaycan öz haqlı iradlarında qətiyyətlidir. Hesab edirəm ki, Azərbaycanın iqtisadi imkanları, ordu potensialı, siyasi iradəsi ona imkan verir ki, bu dəfə də problemlərinin tək başına çözülməsinə nail olsun”.
U.Mirzəyev Ruben Vardanyanın Nobel Sülh Mükafatına namizədliyi barəsində də danışıb. O qeyd edib ki, Vardanyan mükafatı almaq üçün tətbiq edilmiş maddələrin heç birinə uyğun gəlmir:
“Bu xəbər erməni mediasında yayılan növbəti dezinformasiyadır. Nobel mükafatı fondunun qaydalarına əsasən, Sülh mükafatına namizədlərin adları açıqlanmır, çünki bu, son 50 il ərzində gizli saxlanılır. Bu il Nobelə namizdələrin qəbul prosesi 31 yanvar tarixində yekunlaşıb. Aradan 2 aydan çox vaxt keçib. Niyə indi gündəmə gəlmək istəyirlər? Yayılan məlumatlar ancaq erməni mediasının uydurmasıdır. Vardanyanın bu gün gündəmə gəlməsi müəyyən maliyyə hesabınadır. Onun bu cür gündəmə gəlməsi sanılmasın ki, o xilas olacaq, qarşıda onu gözləyən cəzalardan xilas olacaq. Ona görə də mümkün qədər, maksimum əlində-ovucunda olan pulları özünün piarına, fəaliyyətlərinə, beynəlxalq əlaqələrinə xərcləyir. Ancaq az ehtimal var ki, onun namizədliyini qeydə alsınlar. Namizədliyini müəyyən qurumlar verə bilər. Amma o namizədin dəstəklənməsi uzun bir prosesdir. İstəmirəm ki, Alferd Nobel adına olan Sülh mükafatı Vardanyana təqdim olunsun. Bu məsələdə ciddi bir əsas görmürəm. Onun namizəd olmaq üçün kifayət qədər əsasları, fəaliyyətləri, layihələri icra olunmalıdır. Dünyada barışa, sülhə xidmət edən addımlar atılmalıdır. Bunların heç biri də Vardanyan tərəfindən edilməyib. O separatçı, cinayətkardır. Bu məsələnin ortaya atılmağı cəzasının yüngülləşdirməsi üçün nəzərdə tutulur”.
Oğuz