"Böyük Britaniyanın təşəbbüsü ilə hazırlanan Azərbaycan-Ermənistan liderlərinin görüşünün baş tutmaması bir daha Ermənistanın danışıqlar prosesindən qaçmasının və riyakarlığının göstəricisidir. Məsələ burasındadır ki, Ermənistan rəhbərliyi bütün platformalarda sülh gündəliyindən danışır, amma real görüş imkanı yarananda prosesi pozur. Ermənistanın bu addımı həm də Böyük Britaniyaya qarşı hörmətsizlikdir".
Bu sözləri Ednews - a Milli Məclis deputatı Könül Nurullayeva, B. Britaniyada baş tutmuş “Avropa siyasi birliyi” 4-cü Zirvə toplantısı" zamanı Nikol Paşinyanın Prezident İlham Əliyevlə görüşdən imtina etməsi hadisəsinə şərhində söyləyib:
"Təsadüfi deyil ki, bu ilin fevralında Almaniyanın təşəbbüsü ilə keçirilmiş görüşdən sonra da Ermənistan Azərbaycana qarşı əsassız ittihamlar irəli sürərək prosesi pozmağa çalışdı və Berlinin səylərinə hörmətsiz yanaşdığını göstərdi. Böyük ehtimal, Makronun təkidi ilə Paşinyan Fransadan başqa istənilən Avropa ölkəsinin sülh təşəbbüsünü pozmağa çalışır. Yəni, Makronun Londonda görüş üçün Paşinyana icazə vermədiyini əminliklə söyləmək olar. Zirvə toplantısında Fransa Prezidentinin mətbuat konfransı zamanı Azərbaycanla bağlı söylədiyi fikirlər bunu bir daha təsdiqləyir. Belə ki, Makronun Ermənistanın hərbiləşdirmə siyasətinə haqq qazandırması, Azərbaycana qarşı açıq qərəzli mövqe nümayiş etdirməsi bir daha göstərir ki, rəsmi Paris regionda gərginlik yaratmaq və sülh prosesinə mane olmaq siyasətini davam etdirir. Rəsmi Bakının da bəyan etdiyi kimi, Fransanın sülhə xidmət etməyən və regionda sabitliyi pozan səyləri heç bir nəticə verməyəcək”.
Deputat sülh prosesinin gələcək perspektivinə də toxunub. O, vurğulayıb ki, Azərbaycan sülh gündəliyini, sülh müqaviləsinin tezliklə imzalanmasını və sülh prosesini dəstəkləyir:
"Sülh prosesinı gəlincə, Prezident İlham Əliyevin Zirvə toplantısı çərçivəsində qarşı tərəfin müraciətinə əsasən Almaniya Federativ Respublikasının Kansleri Olaf Şolts ilə görüşdə də bəyan etdiyi kimi, Azərbaycan sülh gündəliyini, sülh müqaviləsinin tezliklə imzalanmasını və sülh prosesini dəstəkləyir. Lakin bunun üçün, ilk növbədə, Ermənistanın konstitusiyasında Azərbaycanın ərazi bütövlüyünə qarşı iddialar və Azərbaycanın Qarabağ regionunun Ermənistanla birləşməsini nəzərdə tutan müddəalar dəyişdirilməli, konstitusional əsasda Ermənistanın Azərbaycana qarşı ərazi iddialarına son qoyulmalıdır. Azərbaycan və Ermənistan xarici işlər nazirlərinin Vaşinqtonda ABŞ Dövlət katibi Entoni Blinkenin dəstəyi ilə keçirilmiş görüşündə də bu məsələ müzakirə olunub. Yəni, Azərbaycanın mövqeyi açıq və aydındır. Burada siyasi manipuliyasiyalara yer yoxdur".
Əkbər Novruz
