Ermənistanın Baş naziri Nikol Paşinyan Azərbaycan Respublikasının prezidenti İlham Əliyevlə görüşməkdən imtina edərək iki ölkə arasında müzakirəsi gedən sülh müqaviləsinin bağlanılmasını yenə də yubadıb. Ölkə liderləri arasında görüş keçirilməməsi gözlənilən sülh müqaviləsi üçün heç də müsbət hadisə hesab edilmir.

Görəsən, Ermənistanın hər fürsətdə danışıqlardan uzaqlaşması regionda baş verən siyasi hadisələrin axınına necə təsir edəcək?

“İstisnasız olaraq ekspertlər və analitiklər Paşinyanın Azərbaycan prezidenti İlham Əliyevlə görüşdən imtina etməsini mənfi qiymətləndirirlər. Bu niyə baş verir? Görünən odur ki, İrəvan öz oyununu oynayır və vaxtilə Azərbaycan prezidentinin irəli sürdüyü beş əsas prinsip üzrə sülh sazişinin tez və effektiv şəkildə əldə olunmasına qətiyyən həvəsli deyil.”

Bu fikirləri Ednews-a açıqlamasında Xəzər Strateji Araşdırmalar İnstitutunun (RF) baş direktoru İqor Korotçenko bildirib. Onun sözlərinə görə, Ermənistan Azərbaycanın tələblərini yerinə yetirməyərək sülh müqaviləsinin tez bir zamanda əldə edilməsinə əngəl olur:

“Bu, iki dövlətin liderləri arasında əsas mümkün görüş kimi görünür, lakin Paşinyan bu cür görüşlərdən qaçır. Açığı, burada söhbət hələ də ABŞ və Fransa kimi Qərb dövlətlərinin böyük geosiyasi oyunundan gedir. Paşinyan isə, indiki halda Qərb ölkələrinin Cənubi Qafqazdakı maraqlarına xidmət edən qlobal geosiyasət sahəsində sadəcə bir piyadadır.”

ABŞ-ın məqsədi Ermənistan vasitəsi ilə Cənubi Qafqazda hakimiyyəti ələ almaqdır:

“Ermənistan öz siyasəti ilə, bir sıra hərbi məğlubiyyətlərdən sonra hələ də sülh müqaviləsi bağlamaq və müəyyən irəliləmələr əldə etmək üçün bəzi addımlar atır. Digər tərəfdən isə, biz görürük ki, sülh müqaviləsinin yekun mətni ilə bağlı faktiki razılığın əldə olunması mərhələsində ABŞ siyasəti önə çıxır. Ümumiyyətlə, bu aydındır ki, ABŞ-ın məqsədi və vəzifəsi, Ermənistanın nəzarətini ələ keçirməkdir. 

Azərbaycanı bir sıra fundamental məsələlərdə güzəştə getməyə məcbur edərək onu Ermənistanla razılaşmağa vadar etmək və beləcə də regionda hökmranlıq etmək üçün siyasi-iqtisadi təqzyiqlər həyata keçirir. Bu şəraitdə, təbii ki, biz Ermənistan siyasətinin və İrəvanın hakim elitasının ikililiyini mükəmməl başa düşürük.”

Ekspert bildirib ki, Ermənistanın suveren və beynəlxalq səviyyədə tanınmış səviyyədə sərhədləri olan dövlət kimi yaşamaq istəyirsə, Azərbaycanın ortaya qoyduğu şərtləri qəbul etməlidir:

“Lakin, Bakının israrlı, davamlı və məntiqli mövqeyi gec-tez ona gətirib çıxaracaq ki, Ermənistanın Qərbin əlində oyuncaq olmaqdansa olsa belə sülh müqaviləsinin şərtləri ilə razılaşacaq. Mövcud reallıq odur ki,  İrəvan Azərbaycana bu və ya digər şəkildə ərazi iddialarının davam etməsini ifadə edən müddəaları dövlət konstitusiyasından çıxarır. Burada prosesin məntiqi amansızdır. Azərbaycanın yelkənlərində tarixin küləyi əsir və Ermənistan beynəlxalq səviyyədə tanınmış sərhədləri olan suveren müstəqil dövlət kimi yaşamaq istəyirsə, Bakıya doğru hərəkət etməli, Azərbaycan rəhbərliyinin irəli sürdüyü ədalətli və əsaslı arzuları qəbul etməlidir.”

Fərid