"Kütləvi informasiya vasitələri müstəmləkəçiliyin nəticələri və dekolonizasiya prosesinin əhəmiyyəti barədə qlobal məlumatlılığın artırılmasında mühüm rol oynayır".
EDnews xəbər verir ki, bunu Bakıda keçirilən “Media və dekolonizasiya: yüksələn səslər, güclənən narrativlər” beynəlxalq konfransında Bakı Təşəbbüs Qrupunun (BTQ) icraçı direktoru Abbas Abbasov bildirib.
Onun sözlərinə görə, Bakı Təşəbbüs Qrupu son üç ildə bu istiqamətdə əhəmiyyətli nəticələr əldə edib və bu uğurlarda medianın xüsusi payı var.
A.Abbasov jurnalistlərin peşəkarlığını və məsuliyyətini yüksək qiymətləndirərək qeyd edib ki, onların fəaliyyəti cəmiyyətlərin məlumatlandırılması və ictimai şüurun formalaşdırılması baxımından böyük əhəmiyyət daşıyır.
“Jurnalistika dürüstlük və yüksək məsuliyyət tələb edən peşədir. Çox vaxt təzyiq və gərgin iş qrafiki şəraitində çalışan media nümayəndələrinin fəaliyyəti qlobal məlumatlılığın artırılmasına mühüm töhfə verir”, – deyə BTQ-nin icraçı direktoru vurğulayıb.
Aysel Hacıyeva | EDnews
