Bu gün Türkiyədə 19 May – Atatürkü Anma, Gənclik və İdman Bayramı qeyd edilir.

“EDnews” xəbər verir ki, qardaş ölkənin bütün vilayətlərində, xaricdəki diplomatik nümayəndəliklər, habelə Şimali Kipr Türk Cümhuriyyətində bu əlamətdar gün münasibətilə bayram tədbirləri və yürüşlər təşkil olunur.

Prezident Rəcəb Tayyib Ərdoğan bayram nitqində gənclərin ölkənin inkişafının hərəkətverici qüvvəsinə çevriləcəyinə, onların “Türkiyə əsri” məqsədlərinə çatmağa töhfə verəcəyinə əminliyini ifadə edib.

Türkiyə liderinin müraciətində deyilir: “Biz dinc, sabit, firavan və texnoloji cəhətdən inkişaf etmiş Türkiyəni yeni vətəndaş nəsillərinə miras qoymaq üçün əlimizdən gələni edirik”.

Mayın 19-da səhər saatlarında qardaş ölkənin gənclər və idman naziri Osman Aşkın Bak bütün vilayətlərdən paytaxta gəlmiş uşaq və yeniyetmələrin müşayiəti ilə Türkiyə Cümhuriyyətinin qurucusu Mustafa Kamal Atatürkün məqbərəsini ziyarət edib.

Ənənəyə sadiq qalaraq, bu gün liderlər işlərini müvəqqəti olaraq uşaqlara təhvil verir və bununla da dövlətin Türkiyə vətəndaşlarının gələcək nəsillərinə həvalə ediləcəyinin əhəmiyyətini vurğulayırlar.

Bayram günündə üzərində Türkiyə bayraqlarının təsviri olan onlarla hava şarı Kapadokya turizm bölgəsi üzərində səmaya qalxıb.

1919-cu il mayın 19-da Türkiyə Cümhuriyyətinin qurucusu Mustafa Kamal Atatürk Samsun şəhərində gənclər qarşısında məşhur çıxışında ölkə ərazisinin bir hissəsini zəbt etmiş işğalçılara qarşı mübarizənin başlandığını elan edib. Bu müraciət Türkiyə Cümhuriyyətinin yaranmasına damğasını vuran milli azadlıq mübarizəsinin əsasını qoyub.

Fatimə Mərdanlı //EDnews