Xəbər verdiyimiz kimi, Qazax rayon Cəfərli kənd tam orta məktəbinin şagirdləri rayondakı pirlərdən birinə aparılıb və "dilək ağacı" ətrafında onların fotosu çəkilib. Xəbər ictimaiyyət və cəmiyyət arasında ciddi qınaq obyektinə çevrilib, tənqdilər yazılıb.
Şagirdlərin təhsil almaqları yerinə xurafata sürüklənmələri nə dərəcədə doğrudur? Müəllimin uşaqları məcbur şəkildə dinə cəlb etməyi, batil inancalara aparamağı düzgündürmü? İslam dini bunu necə qarşılayır? Müəllim təhsil sistemindən uzaqlaşdırıla bilərmi?
Bu barədə suallarımızı ilahiyyatçı Tural İrfan və təhsil eksperti Elmin Nuri cavablandırıb.
Tural İrfan Ednews-a açıqlamasında bildirdi ki, ölkəmizdə din dövlətdən ayrıdır. Təhsil müəssisələrində şagirdləri dini ocaqlara, ibadət yerlərinə, pirlərə yox, təhsilə cəlb etməlidirlər:
“Din işi ilə məşğul olan, dini təbliğatı təşkil edən qurumlar var. Lazım olanda məktəblərdə də tədbirlər təşkil edirlər. Qazaxda yaxşı olardı ki, o şagirdləri təhsillə bağlı, tarixi abidələrlə bağlı yerlərə aparaydılar. Məsələn, Seminariya binası, Molla Vəli Vidadinin məzarı, Səməd Vurğunun ev muzeyi... Bununla yanaşı asudə vaxtlarda tarixi, mədəni əhəmiyyət kəsb edən yerlərə, tarixi abidələrə, hətta dini ocaqlara təhsil müəssisəsi tərəfindən ekskursiya təşkil etməyin də faydaları çoxdur. Ancaq xurafat mənbəyi olan, budaqlarına qara bağlanmış ağacın ətrafına şahidləri cəlb etmək anlamsız bir işdir. Müəllimin vəzifəsi öncə təhsil verməkdir. Şagirdləri xurafata cəlb etmək yox, xurafatdan uzaq durmağa təşviq etməkdir. Aparırdısa elə tarixi əhəmiyyət kəsb edən, mədəni - tarixi abidə sayılan Qazax Cümə məscidinə, İsrafil ağanın tikdirdiyi tarixi kompleksə aparıb əyani tanış edəydi”.
T.İrfan qeyd etdi ki, görünür səbəb başqadır.Yəqin ki, növbəti dəfə də Tovuzdakı Haça Qayaya apararlar.
“Əlavə olaraq qeyd edim ki, qayalar, daşlar, ağaclara inam İslamdan əvvəlki dinlərdə movcud olub. İslam dinində belə şeylər xurafat hesab olunur və müasirliklə də uyğun deyil”.
Elmin Nuri isə açıqlamasında qeyd etdi ki, zaman-zaman məktəblərdə yaşanan xoşagəlməz halların nəticəsi olaraq müəllimlərin işdən azad edilməsi kimi addımlar atılmasının şahidi oluruq. Təbii ki, müəllimin əmək müqaviləsinə xitam verilməsi Əmək Məcəlləsinin tələbləri əsasında həyata keçirilir. Məcəllənin işəxitamla bağlı maddəsisinin bəndləri müəllimin hansı səbəbdən işdən çıxarılması faktı ilə adekvar olmalıdır:
“Qazaxın Cəfərli kəndində yaşanan hadisə - Müəllimin uşaqları pirə apararaq orada "Dilək ağacı" ətrafında foto çəkdirməsi-təbii ki, bir təhsil adamı adına, pedaqoji və maarifçilik nüfuzu adına o qədər də xoşagələn hadisə deyil. Amma sırf buna görə, təhsilverənin işdən çıxarılması ehtimalı az, yaxud da yox səviyyəsindədir. Ehtimal təbii ki, Əmək Məcəlləsinə istinadən irəli sürülür. Burada atıla biləcək addım, müəllimə məktəb rəhbərliyi, həmçinin, aidiyyatı təhsil sektoru (Burada Qazax rayonu üzə təhsil sektoru), həmçinin, bu sektorun tabe olduğu Regional Təhsil İdarəsi tərəfindən xəbərdarlıq edilə bilər.
Azərbaycan multikultural ölkə olsa da, dini inanc azadlığına hər zaman tolerant münasibət göstərsə də, bir təhsil müəssisəsinin şagirdlərini kütləvi şəkildə cahil dini meyllərə sövq etmək yolverilməz haldır. İnanırıq ki, şagirdləri qanunvericiliyin tələbi ilə ekskursiyaya aparan müəllimlər pir və ziyarətgahları yalnız tarixi abidə kimi onlara tanıdacaq. Onlara bir inanc və tapınaq mənbəyi kimi baxmayacaqlar”.
Qazax Təhsil İdarəsi ilə dəfələrlə əlaqə saxlamağa çalışsaq da zənglərimizə cavab verən tapılmadı.
Oğuz