Umud Mirzəyev: - “Mina problemi ilə bağlı gecə-gündüz iş aparılmasına ehtiyac var” - ednews.net

18 Yanvar, Çərşənbə axşamı

Umud Mirzəyev: - “Mina problemi ilə bağlı gecə-gündüz iş aparılmasına ehtiyac var”

Cəmiyyət A- A A+

İşğaldan azad edilən ərazilərimizdə erməni quldur dəstələrindən “miras” qalan mina problemi davam edir. Noyabrın 28-də daha iki hərbçimizin Füzuli rayonunun Şükürbəyli kəndində piyada əleyhinə minaya düşüb. Onlardan birinin ayağı topuqdan aşağı amputasiya olunub, digərinin ayağı cərrahi əməliyyat olunaraq amputasiya olunmadan xilas edilib.

Qeyd edək ki, son zamanlar insanların işğaldan azad edilmiş ərazilərdə minaya düşməsi halları intensivləşib. Təkcə noyabr ayında ən azı 8 nəfər minaya düşüb. Onlardan 2 nəfər həlak olub, daha 6 nəfər isə müxtəlif dərəcəli bədən xəsarətləri alıblar. Minaya düşənlərdən 3 nəfəri hərbçi, 5 nəfəri isə dinc sakin və ərazidə quruculuq işləri ilə məşğul olanlardır.

Bu faktlar bir daha onu sübut edir ki, hələ də Azərbaycanın üzləşdiyi mina problemi ilə bağlı səssiz qalan beynəlxalq ictimaiyyət, əlaqədar orqanlar əməli işə keçməli, mina xəritələrinin verilməsi ilə bağlı Ermənistana təzyiq göstərməlidirlər. Bu, yurd-yuvasından didərgin düşən insanların işğaldan azad olunmuş torpaqlara Böyük qayıdışı zamanı təhlükəsiz şəraitdə yaşaması baxımından xüsusilə vacibdir.  

Beynəlxalq Avrasiya Mətbuat Fondunun (BAMF) Prezidenti Umud MirzəyevEDNews.net-ə açıqlamasında bildirib ki, mina təhlükəsizliyi ölkəmiz üçün uzun müddətə aktuallıq kəsb edən mövzudur: “Məsələ ondadır ki, torpaqlar həddindən artıq çirkləndirilib. Bununla bağlı gecə-gündüz fəaliyyət aparılmasına ehtiyac var. Azad edilmiş ərazilərdə bir tərəfdən təxirə salınmadan infrastruktur layihələrinin həyata keçirilməsi vacibdir. Digər tərəfdən də çirklənmiş ərazilərdə infrastruktur layihələrin həyata keçirilməsi üçün şərait yaranmalıdır. Bunun üçün ölkədə bu istiqamətdə məsul olan qurumlar kifayət qədər ciddi fəaliyyət göstərir. Bilirsiniz ki, bu məsələdə ANAMA əsas qurumdur. Eyni zamanda, bu istiqamətdə Fövqəladə Hallar Nazirliyinin, Müdafiə Nazirliyinin və digər qurumların, beynəlxalq təşkilatların nümayəndələri də fəaliyyət göstərirlər”.

U. Mirzəyev bildirib ki, bütün səylərə baxmayaraq insidentlər hələ də baş verir və hətta intensivləşib: “Təəssüf ki, son günlər bir-birinin ardınca belə insidentlər baş verir. Özü də insidentlər o yerlərdə baş verir ki, Ermənistan guya o yerlərlə bağlı minalanmış ərazilərin xəritələrini təqdim etmişdi. Bu həmin xəritələrin nə qədər etibarsız olduğunu sübut edir. Bu gün Avropa İttifaqının maliyyə yardımı, UNICEF-in Azərbaycan Nümayəndəliyinin və ANAMA-ın dəstəyi ilə Beynəlxalq Avrasiya Mətbuat Fondu (BAMF) və "Dayaq" qeyri-hökumət humanitar yardım təşkilatı tərəfindən 10 regionda Partlayıcı Sursatların Təhlükəsinə dair Maarifləndirmə (PSTM) layihəsi həyata keçirilir. Layihənin hədəfi keçmiş təmas xəttində yaşayan və oraya yaxın olan 100 min əhalini əhatə etmək, bu insanları mina təhlükəsi ilə bağlı maarifləndirmək, mina problemi və ondan qorunmaqla bağlı əhali ilə birbaşa işlər görməkdir. İlkin olaraq, bu layihə çərçivəsində 500 nəfər icma rəhbəri təlim keçir ki, onlar da öz növbəsində gələcəkdə əhalinin maarifləndirilməsi istiqamətində müxtəlif vasitələrdən istifadə edib dəstək göstərəcək, prosesdə iştirak edəcəklər”.

BAMF Prezidenti bir daha region əhalisinə, eləcə də işğaldan azad edilmiş ərazilərə səfər etmək istəyən insanlara çağırış edərək bildirib ki, onlar mina ilə çirkləndirilmiş regionlara səfərlərlə bağlı həm təmkin göstərməli, həm də səfər zamanı ən etibarlı, sınanmış yollardan və izlərdən istifadə etməlidirlər: “Yəni heç zaman özfəaliyyətə yol vermək olmaz. Bu regionlarda təhlükə, ölüm adamı hər addımda izləyir. Ona görə də, yalnız təmizlənmiş, sınaqdan çıxmış yollardan, izlərdən və məkanlardan istifadə etmək çox vacibdir”.

Qeyd edək ki, BAMF-ın təşkilatçılığı ilə PSTM layihəsi çərçivəsində maarifləndirmə tədbirləri Tərtər, Bərdə, Füzuli, Göygöl, Goranboy və Daşkəsəndə həyata keçirilir. Layihə qeyd olunan 6 rayon və hər birində 10 000 (on min) insan olmaqla, ümumilikdə 48 icma sakinini əhatə edir. Regionda aparılacaq maarifləndirmə tədbirləri mina və partlamamış silah-sursat təhlükəsi riskinin azaldılmasında önəmli rol oynayacaq.  

Mətndə səhv varsa, onu qeyd edib Ctrl+Enter düyməsini basaraq bizə göndərin.

EurasiaDiary © Xəbərlərdən istifadə zamanı hiperlinklə istinad olunmalıdır.

Bizi izləyin:
Twitter: @EurasiaAz
Facebook: EurasiaDiaryAzerbaycan
Telegram: @eurasia_diary


Загрузка...