“"Əl-Cəzirə" hazırda 70-dən çox ölkəni əhatə etməkdədir. Təbii ki, biz bütün dünyada yayımlana bilmərik. Azərbaycanın bu siyahıda olması isə, bizim üçün strateji əhəmiyyətli olmasından irəli gəlir".
Ednews xəbər verir ki, bu sözləri "Əl-Cəzirə" media holdinqinin İnsan Haqları və Söz Azadlığı departamentinin direktoru, hazırda Beynəlxalq Avrasiya Mətbuat Fondunun dəvəti ilə Azərbaycanda səfərdə olan Sami Əl Hacc Real televiziyasına verdiyi müsahibəsi zamanı deyib.
O, eyni zamanda Azərbaycanda "Əl-Cəzirə"nin Beynəlxalq Avrasiya Mətbuat Fondu ilə birgə ərsəyə gətirdiyi Azərbaycan haqda filmlərdən də söz açıb. Sami Əl Hacc qeyd edib ki, həmin filmlər vasitəsilə Azərbaycan Ərəb dünyasında yaxından tanına bilib.
Bundan əlavə Sami Əl Hacc "Əl-Cəzirə"nin 44 günlük Vətən müharibəsi zamanı informasiya yayımındakı fəaliyyətindən bəhs edib. O, kanalın Azərbaycan haqda bundan sonra daha çox informasiya əldə etmək istədiyini və bunun ərəb dünyasına çatdırılmasının zəruriliyini vurğulayıb.
Müsahibəsi zamanı qonaq həmçinin BAMF-la imzalanan memorandumdan söz açıb və "Əl-Cəzirə"nin Azərbaycanda bir çox tədbirlərin keçirilməsində maraqlı olduğunu da qeyd edib. Sami Əl Hacc bununla bağlı ötən il BAMF-ın birgə dəstəyi və 50 yerli jurnalistin iştirakı ilə keçirilən “Jurnalistlərin Təhlükəsizliyi” adlı təlim haqda da söz açıb.
Söhbət əsnasında Sami Əl Hacc Qarabağa böyük qayıdışdan da danışıb və bu yolda maneə olan mina probleminə də toxunub.
“Biz həm də mina problemini dünyaya çatdırmaq üçün buradayıq. Bilirsiniz ki, Qarabağda işğaldan azad edilmiş torpaqlara böyük qayıdış gözlənilir, lakin orada hələ də zərərsizləşdirilməmiş minalar mövcuddur. "Əl-Cəzirə" məhz bu səbəbdən bu gün buradadır”.
Qeyd edək ki, 31 mart – 1 aprel tarixlərində Bakıda “Humanitar Minatəmizləmə Fəaliyyəti və Dayanıqlı İnkişaf Məqsədləri” adlı beynəlxalq konfrans keçirilib. Tədbirdə mina problemi müzakirə edilib. ANAMA və BMT-nin İnkişaf Proqramı tərəfindən keçirilən, dünyanın 30 ölkəsindən 120-dək nümayəndənin qatıldığı konfransda Sami Əl Hacc də geniş nitqlə çıxış edib.
Sami Əl Haccın müsahibəsini təqdim edirik:
