Az miqdarda narkotikə görə cinayət məsuliyyəti ləğv olunur. Belə ki, İnzibati Xətalar Məcəlləsinə təklif olunan dəyişikliyə görə, qanunsuz olaraq narkotik vasitələrin, psixotrop maddələrin istehlakına, satış məqsədi olmadan az miqdarda hazırlanmasına, əldə edilməsinə, saxlanılmasına, daşınmasına və ya göndərilməsinə görə üç yüz manatdan dörd yüz manatadək məbləğdə cərimə ediləcək.
Layihə səsə qoyularaq üçüncü oxunuşda Milli Məclisin bu gün keçirilən plenar iclası zamanı qəbul edilib.
Bəs, bu qərar narkotik istifadəçilərinə əməllərini genişləndirməklə bağlı şərait yarada bilərmi?
Məsələ ilə bağlı Ednews-a danışan narkomaniya üzrə eksperk Emil Maqalov bildirib ki, biz cəmiyyət olaraq narkotik istifadəçilərinin cinayətkar yox, xəstə olduğunu qəbul etməliyik.
“Onlarda bir neçə dəfədən sonra yaranan fiziki asılılığı yalnız müalicə ilə qurtarmaq olar. Şəhər və rayonlarımızda isə narkoloji mərkəz narkotik istifadəçilərinə nisbətən azlıq təşkil edir. Bakıda 3000 nəfər narkotik istifadəçisi varsa, 380 nəfərlik dispanser, Sumqayıtda 1000 nəfərlik yerə 28 nəfərlik dispanser, rayonlarda isə bundan da az nəfərlik dispanser yeri var. Düşünürəm ki, qanunun qəbulundan əvvəl bu məsələlərə baxılmalı idi. Çünki necə olsa da narkotik istifadəçilərinə bəladan qurtulmaq üçün cəzanı azaltmaq yox, müalicə lazımdır”.
Ləman Abbaslı
