Bir qədər öncə Bakıda fəaliyyət göstərən 3 nömrəli tam orta məktəbin təsərrüfat işləri üzrə direktor müavini İsmət Yusifovanın orta təhsili belə olmadan, yəni attestatsız bu vəzifəni tutması barədə yayılan məlumat cəmiyyətdə təəccüblə və eyni zamanda narazılıqla qarşılanıb.
Məsələ ilə bağlı müvafiq qurumlar araşdırma aparsa da məsələ hələ ki, öz həllini tapa bilməyib.
Belə ki, Bakı Şəhəri Təhsil İdarəsindən mətbuata verilən açıqlamada bildirilib ki, məsələ ilə əlaqədar hər hansı yenilik yoxdur. Əlavə məlumat olarsa, ictimaiyyətə açıqlanacaq.
3 nömrəli tam orta məktəbin direktoru Almaz Həsrət isə açıqlamasında direktor müavininin işdən azad olunması ilə bağlı heç bir addım atılmadığını iddia edir.
“İsmət xanım ilə bağlı yekun qərar verilməyib. O, hər səhər işə gəlir. Çox iddialı şəkildə deyir ki, məni heç kim işdən çıxara bilməz. Mən ona dedim ki, səni işdən çıxartdırmaq fikrim yoxdur, amma məktəbdə təhsilinə uyğun işlə təmin olunmalısan. Məndən öncəki direktor məsələdən agah olub, idarəyə məlumat verib. İndi olduğu kimi onda da araşdırma aparıldığı bildirilib, amma nəticəsiz qalıb”.
Təhsil üzrə ekspert Elçin Əfəndinin sözlərinə görə, bu problem yalnız sözügedən məktəblə bağlı deyil.
(1).jpg)
“Təəssüflər olsun ki, bəzi məktəblərdə təsərrüfat işlərini idarə edən şəxslərin ali təhsili yoxdur. Bu əlbəttə yolverilməzdir. Müvafiq təsərrüfat işlərini idarə etmək üçün ən azı attestat təhsili olması vacibdir. Amma görünən odur ki, bu şəxs ya kiməsə arxayındır və yaxud orada ardıcıl olaraq çalışdığı üçün bu vəzifəni ona həvalə ediblər. Təsərrüfat işləri üzrə direktor müavini əsasən məktəbin təmir işləri, eyni zamanda maddi təminat sektoru sahələrinə nəzarət edir. Bura məsul müvafiq ixtisasları bitirmiş şəxslərin təyin olunması daha məqsədəuyğundur. Məsələn, texnologiya müəllimliyi ixtisasını bitirmiş şəxs bunu idarə edə bilər və s. Amma əgər bir şəxs attestatı olmadan bu vəzifəni icra edirsə, istənilən halda bu düzgün deyil. Yəqin ki, Bakı Təhsil İdarəsi və ya Təhsil Nazirliyi daha konkret cavab verərək məsələyə aydınlıq gətirəcək”.
E. Əfəndi əlavə edib ki, məktəb direktoru özü hər bir şəxsi işdən çıxara bilər.
“Çünki həmin istiqamət üzrə işçinin işə qəbul olunması və yaxud işdən azad olunması birbaşa direktorun səlahiyyətindədir və bu məsələdə direktor adekvat addım ata bilər”.
Qeyd edək ki, 3 nömrəli məktəbin təsərrüfat işləri üzrə direktor müavini İsmət Qədir qızı Yusifova 2004-cü ildə işə qəbul edilib. O, orta təhsili olmadığı halda hələ də direktor müavini vəzifəsini icra edir.
Gülnar Səlimova
