Mayın 10-da Sabunçu rayonunun Bakıxanov qəsəbəsində yerləşən "Sevgi Evi" adlı qadın və uşaq sığınacağında müxtəlif dövlət orqanlarının iştirakı ilə keçirilən monitorinq zamanı uşaqlara qarşı zorakılıq hallarının olduğu aşkarlanıb.
Sabunçu Rayon Prokurorluğunda aparılan araşdırmalarla qeyd edilən sığınacaqda 2022-ci ilin fevral ayının sonundan may ayının əvvəlinə qədər saxlanılan C.M.-nın (ad, soyadı şərti) sığınacaqda qaldığı müddətdə müxtəlif psixi və fiziki zorakılığa məruz qaldığı, həmçinin onun sığınacaqdakı digər azyaşlılara da psixi və fiziki zorakılıq göstərilməsinə şahid olduğu müəyyən edilib.O cümlədən sığınacaqda saxlanılan digər iki nəfər azyaşlının bədəni üzərində orada saxlandıqları tarixlərə yetirilməyə uyğun gələn xəsarət izləri aşkarlanıb. Hazırda istintaq davam edir.
Sığınacağın təşkilatçısı isə Könül Qasımovadır. Özünü sığınacağın rəhbəri kimi təqdim edən qadın isə mətbuata açıqlamasında bu barədə danışmaq istəmədiyini, hər şeyin qaydasında olduğunu söyləyib.
Azərbaycan Uşaqlar Birliyinin sədri Kəmalə Ağazadənin sözlərinə görə, bu ilin ilk 5 ayında sığınacağa zorakılığa məruz qalmış 40 uşaq daxil olub. O qeyd edib ki, hər il ortalama zorakılığa məruz qalan, şiddət görən 250-270 uşağın problemi ilə qarşılaşılır.
Uşaq sığınacaqlarının yaradılması və fəaliyyətinə kimlər nəzarət edir?
Məsələ ilə bağlı “Qadın və uşaq sığınacağı” Mərkəzinin sədri Mehriban Zeynalova Ednews-a açıqlaması zamanı bildirib ki, qanuna əsaslanaraq bu sığınacaqlar açıla bilər.
.jpg)
“Məişət zorakılığının qarşısının alınması haqqında” Qanunda dövlət və qeyri-dövlət təşkilatlarının nəzdində sığınacaqların açılması məsələsi var. Qanunun bir bəndində deyilir ki, sığınacaqların akreditasiyası mütləq şəkildə lazımdır. Həmin sığınacaq bu sahə üzrə ixtisaslaşıbmı, personalı varmı, saxlama yerləri uyğundur və ya deyil, bunlara baxılır. Nazirlər Kabinetinin də sığınacaqlarla bağlı əsasnaməsi var. “İnsan alverinə qarşı mübarizə haqqında” qanunda sığınacaq və sığınacağın qaydaları haqda ayrıca əsasnamə var. Əmək və Əhalinin Sosial Müdafiəsi Nazirliyinin də bununla bağlı özünün akreditasiya olunmuş təşkilatlara qoyulan tələbləri var. Sığınacaq açılmazdan öncə Nazirlik baxış keçirir və sonra qərar verir ki, akreditasiya olunsun ya yox”.
Mehriban Zeynalova qeyd edib ki, rəhbəri olduğu təşkilatda və digər sığınacaqlara bu il ərzində iki yoxlama olub.
“Onlardan biri Nazirlər Kabinetinin özünün qərarı ilə Daxili İşlər Nazirliyi, Əmək və Əhalinin Sosial Müdafiəsi Nazirliyi, Səhiyyə Nazirliyi, Ailə, Qadın və Uşaq Problemləri üzrə Dövlət Komitəsindən ibarət böyük heyət monitorinq keçirdi. Həmin monitorinqin nəticələrini bizə demədilər və yalnız tövsiyyələr verdilər. Amma konkret sığınacaqlar vardı ki, dəyişkiliklər edilməsi barədə xəbərdarlıq etdilər. Əks təqdirdə, onların bağlanmaq ehtimalı vardı”.
Mehriban Zeynalova əlavə edib ki, hər sığınacağın özünün prosedur qaydaları var.
“Məsələn, biz uşaqları yalnız polis tərəfindən, yaxud Ailə, Qadın və Uşaq Problemləri üzrə Dövlət Komitəsi və yerli icra hakimiyyəti, qeyri hökumət təşkilatı və ya vəkillər göndərəndə qəbul edirik. Uşaq qəbulu yalnız bu mənbələrə istinad edilməlidir. Küçədə tək qalsa belə onu polisin iştirakı olmadan qəbul etmək qeyri-qanunidir.
Bildiyimə görə bu sığınacaq akreditasiya olunmadan fəaliyyət göstərirdi. Uşaqları da ya özləri aşkarlayıblar ya da müraciətlər olub. Ona görə də burada monitorinqin aparılması qanunauyğun idi. Bu cür monitoqinqlərin aparılmasını dəstəkləmək lazımdır. Ölkəmizdəki sığınacaqlarda yoxlamalar il ərzində bir dəfə keçirilir. Bizdə aparılan monitorinq zamanı təklif etdim ki, belə yoxlamalar xəbərdar olunmadan aparılsın”.
Gülnar Səlimova
