Mərmərə Qrupu Strateji və Sosial Araşdırmalar Fondunun təşkilatçılığı ilə iyun ayının 7 -9 tarixlərində İstanbulda 25-ci Avrasiya İqtisadi Zirvəsi baş tutub.

Keçirilən tədbirdə 40-dan çox ölkədən yüzlərlə mötəbər qonaq, o cümlədən dövlət və hökumət başçıları, səfirlər, nazirlər, merlər və cəmiyyətin bütün təbəqələrindən olan liderlər iştirak edib.

“Enerji və enerji siyasəti”, “Miqrasiya problemləri və pandemiyadan sonrakı iqtisadiyyat”, “İqlim dəyişikliyi və ərzaq təhlükəsizliyi”, “Qlobal iqtisadiyyatın üzləşdiyi risklər”, “Pandemiya”, Rusiya-Ukrayna müharibəsinin sülhə olan təhdidləri”, habelə “Rəqəmsal dünyaya doğru inteqrasiya” kimi bir çox mühüm mövzular ətrafında ikitərəfli və panel müzakirələri keçirilib.

Zirvə toplantısında Azərbaycan nümayəndə heyətindən Qafqaz Müsəlmanları İdarəsinin (QMİ) sədri Allahşükür Paşazadə, Energetika nazirinin müavini Samir Vəliyev və Ələt Azad İqtisadi Zonasının icraçı direktoru Elşən Rəhman iştirak ediblər.

Bundan əlavə, builki sammitdə “Daha mükəmməl dönüş” mövzusu altında post-pandemiya dövrü və Rusiya ilə Ukrayna arasındakı münaqişənin dünyaya göstərdiyi əsas təsir, yeni enerji iqtisadiyyatı, qlobal enerji iqtisadiyyatı, tərəfdaşlıq, rəqəmsallaşma, daha yaşıl planet, şəhərlər arasında dialoq, ərzaq və əmtəə böhranı, aclıq, yoxsulluq, iqlim dəyişikliyi, məcburi miqrasiya və sair bu kimi məsələlər müzakirə edilib. Tədbirdə çıxış edən Birləşmiş Millətlər Təşkilatının Cenevrə  ofisinin Baş Direktoru David Çikvaidze, Mərmərə Qrupu Strateji və Sosial Araşdırmalar Fonduna toplantıda qaldırılan bütün vacib problemlərin həllinə görə təşəkkür edib.

“Mərmərə Qrupu Strateji və Sosial Araşdırmalar Fondu BMT-nin ECOSOC müşahidəçi statusuna malikdir. İnanıram ki, fond müzakirə mövzusu olan bəzi vacib məsələlərin həllində öz imtiyazlarından geniş istifadə edə biləcək”.

BMT rəsmisi enerji məsələsi üçün təşkil olunan toplantının vacibliyini də vurğulayıb.

“İnkişafı gücləndirən əsas məsələ bəşəriyyətin gələcəyi ilə bağlı ehtiyaclara diqqətin ayrılmasıdır. Bu gün dünyamız çoxsaylı problemlərlə üz-üzədir. BMT-nin baş katibi Antonio Quterreş qlobal enerji böhranı ilə bağlı bəzi məsələlərə toxunaraq, hər bir tələb və tapşırıqları diqqətlə incələməyi xahiş edib. Yanacaq və enerji böhranı dövrümüzün ən ciddi probleminə çevrilib. Enerji böhranına təsir edən Ukrayna müharibəsi artıq həyəcan təbilini çalır”, – deyə David Çikvaidze belə qeyd edib.

• Tag:
• David Çikvaidze
• 25-ci Zirvə Görüşü