Yay meyvələrinin gilas, alça, əriyin qiymətinin baha olması cəmiyyət arasında narazılığa səbəb olub. Belə ki, hazırda bazarlarda mövsümü meyvələrin qiyməti beş manatdan-on səkkiz manata qədər artır.
Nəzərə alsaq ki, Rusiyaya ixrac edilən meyvələrin bir hissəsi də Azərbaycandan gedir.
Elə gilas da...
Rusiyada yaşayan soydaşımızın Ednews-a verdiyi məlumata görə, hazırda paytaxt Moskva bazarlarında Azərbaycandan idxal edilən gilasın bir kiloqramının qiyməti 200 rubldur( 6.40 AZN).
“Rusiyaya bir çox post sovet ölkələrindən gilas ixrac olunur. Bu ölkələr arasında Özbəkistan,Türkmənistan, Krım, Tacikistan və Azərbaycan da var. Buna görə də qiymətlər müxtəlifdir. Azərbaycandan gətirilən gilas paytaxt Moskvada 200, Moskva ətrafı ərazilərdə isə 100-150 rubldur”.
Bəs, yerli məhsul Rusiyaya aparılıb ucuza satılırsa, paytaxt bazarlarda niyə alıcılara baha qiymətə təklif edilir? Niyə qonşu Rusiyaya ucuz qiymətə idxal edilən yerli məhsul ölkəmizdə baha qiymətə satılır?
Kənd təsərrüfatı üzrə ekspert Cəfər İbrahimli hesab edir ki, əgər belə olsaydı onda fermerlər məhsullarını xarici bazarda yox, daxili bazarda satar, xeyrini görərdilər.
“Bu təsdiq olunmasına ehtiyyac olan məlumatdır. Əgər Azərbaycanda daxili bazarda bu məhsul baha qiymətədirsə, fermer və iş adamlarının məhsulu Rusiyaya aparmasını real görünmür. Ola bilsin ki, əvvəlcədən nəzərdə tutulmuş kütləvi bağlar hansısa şirkətlərlə müqavilə əsasında satış edir. Ancaq fermerlərin bu addımı atmasını doğru hesab etmirəm”.
Ekspert Cəfər İbrahimli cari illə bu il arasında idxal və ixrac zamanı heç bir fərq olmadığını vurğulayıb. O, həmçinin söhbət əsnasında bahalaşmanın səbəblərindən də danışıb.
“Gömrük rəqəmlərinə baxanda 2020 və 21-ci ilin ilk beş ayı ilə 2022-ci ilin ilk beş ayı arasında ixrac rəqəmlərində elə də fərq görmürük. Standart nəhsullar Rusiyadan bizim ölkəyə idxal olunur, bizdən də Rusiyaya ixrac olunur. Təkcə Rusiyada yox, elə bütün ölkələrə edilən idxal, ixracda böyük rəqəm dəyişikliyi yoxdur. Bu il bazarda qiymətlərin daha baha olmasının bir neçə səbəbi var. Birincisi məhsul olduğundan azdır, ikincisi məhsulun istehsalı ilə bağlı xərclər artıb. Nəzərə alaq ki, yay məhsullarını uzun müddət anbarlarda saxlamaq olmur, onda bahalaşmanı normal qəbul edə bilərik”.
Ləman Abbaslı
