Bugün ADA universitetində "Bakı Yay Enerji Məktəbi"nin bağlanış mərasimi baş tutub.
Ednews xəbər verir ki, mərasim İnkişaf və Diplomatiya İnstitunun, Azərbaycan Dövlət Neft şirkətinin (SOCAR), BP Azerbaijan, "Kolin”, “Мasdar” və “TotalEnergies” şirkətlərinin birgə təşkilatçılığı ilə keçirilib.
Mərasimdə ADA universitetinin rektoru, səfir Hafiz Paşayev, Azərbaycan Respublikası Dövlət Neft Şirkətinin Sərmayələr və Marketinq üzrə vitse-prezidenti Elşad Nəsirov çıxış ediblər.
Çıxış zamanı Hafiz Paşayev Azərbaycanın qaz marketinqində özünəməxsus yeri olduğunu vurğulayıb.
16-cı BYEM-də iştirak etmək üçün 13 ölkədən 43 iştirakçı seçilib. İştirakçılar enerji şirkətlərinin kiçik və orta səviyyəli mütəxəssisləri, dövlət qurumlarının, səfirliklərin və beynəlxalq təşkilatların siyasətçiləri və dövlət qulluqçuları, həmçinin enerji və ətraf mühit problemlərini araşdıran alimlər, jurnalistlər idi.
Proqram çərçivəsində iştirakçılar Azərbaycanın mədəniyyət paytaxtı Şuşada və paytaxt Bakının görməli yerlərində olublar.
Sonda "Bakı Yay Enerji Məktəbi"ni bitirən iştirakçılara sertifikatlar təqdim olunub.
Qeyd edək ki, "Bakı Yay Enerji Məktəbi" Xəzər bölgəsinə xüsusi diqqət yetirməklə enerji və ekologiya məsələlərinin araşdırılması, daha dəqiq tədqiq edilməsi üçün dünyanın tanınmış alimlərini, siyasətçi və mütəxəssislərini bir araya gətirən, ənənəvi keçirilən ikihəftəlik sertifikat proqramıdır.
Nəzrin Beydiyeva