Son günlər sosial şəbəkələrdə, bəzi Kütləvi İnformasiya Vasitələrində unun qiymətinin yenidən bahalaşdığına dair məlumatlar yayılıb. Məlumata görə hazırda un qıtlığı müşahidə olunur və bu da öz növbəsində çörəyin qiymətinin artmasına səbəb olub.
Ednews xəbər verir ki, ekspertlər əsaslı səbəb kimi Rusiya-Ukrayna müharibəsi zamanı Rusiyadan un idxalının azalmasını göstərir.
İqtisadçı ekspert Eyyub Kərimlinin sözlərinə görə - “Sözsüz ki, bunun üçün alternativ təminat kanalları tapılmalıdır. Rusiya-Ukrayna müharibəsi taxıl qiymətlərinə mənfi təsir göstərdi. Lakin son vaxtlar Türkiyə ilə Ukrayna və Rusiya arasında aparılan danışıqlar əsasında taxılın ixracatında imkanlar yaradıldı. Bu da dünya bazarında taxılın qiymətinin aşağı düşməsinə zəmin yarada bilər. Bundan başqa prezident İlham Əliyevin sərəncamına əsasən ölkədə ərzaqlıq buğdanın artırılması üçün fermerlərə dəstək və bazar qiymətinə onlardan alınması bahalaşmaya son qoyacaq”.
Bəs Azərbaycan buğdanı yalnız Rusiyadan almağa məcburdur?
Ekspert yaranan cari situasiya ilə bağlı çıxış yollarından da danışıb. Eyyub Kərimli hesab edir ki, çıxış yolu digər xarici ölkələrdən də buğda idxal etməkdir.
.jpg)
“Bu digər bol taxılı olan ölkələrdən ölkəmizə buğdanın ixracı ilə həyata keçə bilər. Həmin ölkələr Qazaxıstan, Pakistan və Hindistandır. Düzdür, Hindistan bizə uzaq ölkədir, amma digər ölkələrlə saziş bağlayaraq, onlardan əlavə buğda idxal edə bilərik”.
Bəs bahalaşmanın nə qədər davam edəcəyi gözlənilir?
Ekspert hesab edir ki, bu, süni artımdır və bir neçə aya problem həllini tapacaq.
“Hesab edirəm ki, belə bahalaşma müvəqqətidir və süni xarakter daşıyır. Bununla bağlı isə hər hansı göstəriş verilməyib, bu da o deməkdir ki, bir neçə aya problem aradan qalxacaq. Hazırki dönəmdə digər alternativlərdən istifadəni məqsədyönlü hesab etmək olar”.
Qeyd edək ki, əvvəllər Rusiya 20 milyon ton buğda ixrac edirdisə, indi 10 milyon ton ixrac edəcək. Ona görə də həm daxili, həm də ki, xarici amillər səbəbindən Azərbaycanda ərzaqlıq buğdanın və unun qiymətinin artması reallıqdır.
Ləman Abbaslı
