Son zamanlar Azərbaycanın bir sıra dövlət qurumu və banklara qarşı geişmiqyaslı kiberhücumlar həyata keçirilir.
Bəzi ekspertlər bu hücumların dövlət təhlükəsizliyinə təhdid yaratmaq və gizli məlumatları əldə etmək üçün nəzərdə tutulduğunu bildirib.
İnformasiya texnologiyaları üzrə mütəxəssis Sadiq Mirzəyev Ednews - a açıqlamasında qeyd edib ki, müasir dövrdə dövlətlərarası müharibə təkcə səngərlərdə və sərhədlərdə yox, həmçinin virtaul cəbhədə də aparılır.
“Bildiyimiz kimi, dövlət əhəmiyyətli məlumatlar və rəsmi sənədlər idarəetmə sistemini təmin edən proqramlarda cəmlənib. Bunu yaxşı bilən düşmən qüvvələrin ünsürləri məqsədyönlü şəkildə dövlət saytlarına, dövlətin xidməti strukturlarına hücumlar təşkil edirlər. Bu hücumlarda onların bir məqsədi yalnız gizli məlumatları əldə etmək, öyrənmək, pul oğurlamaq, ən pis halda isə bütün sistemi çökdürməkdir”.
Vətəndaşların kiberhücumlardan qorunması məsələsinə toxunan S.Mirzəyev bildirib ki, kiber təhlükəsizliyin təmin edilməsi və möhkəmlənməsində yalnız aidiyyatı qurumlar cavabdehlik daşıyır.
“Dövlət üçün əhəmiyyətli olan proqramların və xidməti servislərin qorunması məsələsində əsasən Dövlət Təhlükəsizlik Mühafizə Xidməti məsuliyyət daşıyır. Əgər vətəndaş dövlət işçisidirsə və virtual xidmətdən istifadə edirsə, onda o, həmin proqramların mühafizəsinə diqqətli yanaşmalı, səhv etməkdən çəkinməli və ani hücumlardan ehtiyatlı olmalıdır. Adi vətəndaşa gəldikdə isə o, kiberhücumlarda heç bir məsuliyyət daşımır”.
Ekspert bunu da nəzərə çatdırıb ki, hər dövlət qurumu istənilən kiberhücumlardan qorunmalı, bununla bağlı ciddi tədbirlər görməlidir.
“Bu hücumların qarşısının alınması üçün ilk növbədə bir sıra təcrübələr həyata keçirilməlidir. Kiberhücumların növləri çoxdur, dövlət bütün bunların hamısına hazır olmalıdır. Edilən hücumlara qarşı mübarizəni gücləndirmək üçün mütləq şəkildə xüsusi sistem yaradılmalıdır, informasiya texnologiya sistemində təhlükəsizlik tədbirləri sərtləşdirilməlidir. Bu işlər görülməlidir ki, dövlətin önəmli proqamlarına və xidməti qurumlarna ziyan dəyməsin”.