Bakının Heydər Əliyev adına Beynəlxalq Hava Limanına girişin ödənişli əsaslarla olması xeyli müzakirələrə səbəb olur. Həm Hava limanına girişin ödənişli olması, həm insanların parkinq ödənişini etməsi üçün saatlarla zaman gözləməli olması narahatlığa səbəb olur.
Ednews məsələ ilə bağlı ekspertlərin fikirlərini öyrənib.
Ekspert Nazim Bəydəmirli:
“Əksər ölkələrdə hava limanlarına giriş bir neçə saatlıq ödənişsizdir. İnsanlar rahatlıqla şəxsi nəqliyyatdan istifadə edə bilirlər. Bizim hava limanının “özəlliyi” ondan ibarətdir ki, vətəndaşların büdcəsinə ziyan vurur. Toplanan vəsaitlərin də necə istifadə olunması məlum deyil. Bu gün də görürük ki, idarəetmədə ciddi problemlər mövcuddur. Bu gün öz hesabımda video paylaşmışdım. Sübh vaxtı orada o qədər növbə olmamalı idi. Parkomatların önündə böyük növbə var idi. Görünən o idi ki, onların bir neçəsi çalışmırdı. Hər kəs bu məsələdən narazıdır. Neçə dəfə də şikayət olunub. Vətəndaşlar bu cür süni yaradılan problemlərin tez bir zamanda aradan qaldırılmasını istəyir”- deyə ekspert bildirib.
Ekspert Elməddin Muradlı:
“Demək olar ki, bu məsələ ilə əlaqəli ölkədə çox adam haqlı olaraq narazıdır. Vətəndaş 5 dəqiqəlik parkinq üçün belə ödəniş etmək məcburiyyətində qalmamalıdır. Azal-dan sonra Dövlət Dəmir yolu stansiyası da bu yola addım atdı. Təssəvvür edin ki, biz ictimai nəqliyyatın inkişafından danışırıq. Vətəndaşları ictimai nəqliyyatdan istifadə etməyə çağırırıq. Amma indi görün nə baş verir. Bu məsələ bir daha nəzərdən keçirilməlidir. Bakıda bu kimi yerlər çoxdur. Bəzi yerlər ümumiyyətlə, vətəndaşlara qəbz belə vermir. Bu məsələ ilə bağlı ciddi tədbir görülməlidir”- deyə ekspert bildirib.
