Sərnişindaşıma sahəsində fəaliyyət göstərən özəl nəqliyyat şirkətləri ictimai nəqliyyatda mövcud problemlərin aradan qaldırılması, nağdsız ödənişə tam keçidin sürətləndirilməsi və bu sahədə tarif (qiymət) siyasətinə yenidən baxılması barədə müraciət ediblər.
Bu barədə İqtisadiyyat və Sənaye Nazirliyinin mətbuat katibi Abbas Əliyev Ednews-a açıqlamasında bildirib.
Müraciətdə göstərilən məsələrlə bağlı optimal qərarın verilməsində kompleks yanaşmanın tələb olunduğunu nəzərə alaraq, Nazirlər Kabineti tərəfindən Rəqəmsal İnkişaf və Nəqliyyat Nazirliyinə bu sahədə xidmətin davamlılığının və rəqabətin təmin edilməsi, xidmət səviyyəsinin yüksəldilməsi məqsədilə aidiyyəti dövlət qurumlarının, bu sahədə fəaliyyət göstərən iri təsərrüfat subyektlərinin nümayəndələrindən ibarət işçi qrupun yaradılması və qaldırılan məsələlərin həlli yollarının müəyyənləşdirilməsi üçün təkliflər hazırlanması tapşırılıb.
Təkliflər hazırlanaraq hökumətə təqdim olunacaq.
Nəqliyyat üzrə ekspert Eldəniz Cəfərov da saytımıza açıqlamasında bildirib ki, burada qiymətlərin qaldırılması ilə bağlı israr yoxdur.
“Sərnişin daşımada fəaliyyət göstərən özəl daşıyıcı şirkətlərin müraciəti ilə mən də yaxından tanış olmuşam. Burada qiymətlərin qaldırılması ilə bağlı israr yoxdur. Şirkətlər bildirir ki, onların maliyyə vəziyyətləri o qədər də yaxşı deyil. Bu səbəbdən də dövlətdən müəyyən yardım istəyirlər. Dövlət də bu müraciəti qəbul edir. İqtisadiyyat Nazirliyi bununla bağlı müvafiq qurumlara göstəriş verir, işçi qrupun yaradılmasını nəzərdə tutublar. Bu günkü vəziyyətdə ictimai nəqliyyatda qiymətlərin yüksəldilməsindənsə dövlətin bu sahədə subsidiyaların artırlıması daha yaxşı olardı. Dövlət onsuz da bu sahəyə subsidiyalar ayırıb. Eyni zamanda dizel mühərrikləri ilə hərəkət edən avtobuslara görə özəl qurumlara da dizel subsidiyası ayrılır”.
Ayan Rzayeva