Beynəlxalq Avrasiya Mətbuat Fondunun yaradılmasından 30 il keçir. 1992-ci il iyunun 22-də yaranan və elə həmin il sentyabrın 4-də Azərbaycan Respublikası Ədliyyə nazirliyi tərəfindən dövlət qeydiyyatına alınan BAMF artıq 30 ildir ki, vətəndaş cəmiyyətinin formalaşmasında, Azərbaycan həqiqətlərini ən yüksək tribunlardan səsləndirilməsi üçün əlindən gələni əsirgəmir.
30 il bundan əvvəl 1992-ci ildə Beynəlxalq Avrasiya Mətbuat Fondu Azərbaycanda ilk dünya miqyaslı QHT kimi yaradıldı. Ona qədər dövrdə bu cür iri miqyaslı təşkilat Azərbaycanda yox idi. Qurum həm də BMT-də təmsil olunan ilk və yeganə milli qeyri-hökumət təşkilatı idi.
Yarandığı elə ilk gündən qurum çiyinlərində ağır yük daşıyırdı. Sovet imperiyasının çöküşündən sonra regionda ən çətin duruma ücrah edilmiş Azərbaycan dünya erməniliyinin torpaq iddialarının qarşısında da əliyalın buraxılmışdı. Müstəqilliyini yeni bərpa etmiş dövlətin isə kifayət qədər daxili problemləri də vardı. Ölkə vətəndaş müharibəsi nəfəs-nəfəsə dayanmışdı. Belə bir vaxtda vətəndaş cəmiyyətinin qurulmasında, daxili problemlərin stabilləşməsində də konstuktiv münasibət sərgiləmək lazım idi. Həm daxildə, həm də beynəlxalq sferada faktları dəqiq təhlil edərək bunu dünya ictimaiyyətinə doğru çatdırmaq lazım idi.
Fondun prezidenti Umud Mirzəyev eyni ardıcıllıqla və ədalətli şəkildə bu məsələləri beynəlxalq müstəviyə daşımaq missiyasını üzərinə götürmüşdü. O, ilk yarandığı gündən də əsas fəaliyyət istiqamətini bu yolda cizmişdi: Azərbaycan həqiqətlərini beynəlxalq ictimaiyyətə çatdırmaqla bərabər, eyni zamanda bütün beynəlxalq layihələrdə də Azərbaycan adını təmsil etmək əsas şərt olmalı idi.
BAMF çətin vəziyyətdə olan xalqımız üçün hər cür nicat yolları axtarırdı – o ölkənin ən ağır durumlarında beynəlxalq donorların Azərbaycana gətirilməsi ilə məşğul idi. Eyni zamanda fond sovetin şinelindən yeni çıxan bir ölkəni dünyaya inteqrasiya olunmasında, Avropa dəyərlərinin öyrənilməsində və vətəndaş cəmiyyətinin formalaşmasında böyük rol oynamaq və vətəndaşımızın yeni dövr çağırışlarına hazırlanmasında xidmət göstərirdi:
Bunun üçün BMT-nin İnkişaf Proqramı, BMT-nin Qaçqınlar üzrə Ali Komissarlığı, ABŞ Dövlət Departamenti, ABŞ Tədqiqat Əməliyyat Mərkəzi, Avropa Komissiyası, NATO, Beynəlxalq Mətbuat İnstitutu, Beynəlxalq Jurnalistlər Federasiyası, Sərhədsiz Reportyorlar, Beynəlxalq Söz Azadlığı Mübadiləsi, Beynəlxalq Xəbər Təhlükəsizliyi İnstitutu, bir sıra ölkələrin Azərbaycandakı səfirlikləri, Azərbaycan Respublikası Ərazilərinin Minalardan Təmizlənməsi üzrə Milli Agentlik, habelə regiondakı yerli və beynəlxalq qeyri-hökumət təşkilatları ilə əməkdaşlıq çərçivəsində fəaliyyətini genişləndirirdi.
BAMF yarandığı ilk gündən əsasən 5 istiqamətdə fəaliyyətini qurub: Media və vətəndaş cəmiyyətinin inkişafı; qaçqın və məcburi köçkünlərin problemləri; sülh quruculuğu və münaqişələrin həlli; icmaların inkişafı və təhsilin formalaşdırılması.
Fond Beynəlxalq Sülh Bürosunun (BSB), Beynəlxalq Mətbuat İnstitutunun (BMİ), Qaçqınlar və Sığınacaq Axtaranlar üzrə Avropa Şurasının (ECRE), ABŞ Dövlət Departamenti Hərbi-Siyasi İşlər Bürosu Silahların Ləğvi və Qadağan Edilməsi İdarəsinin İctimai-Özəl Tərəfdaşlıq Proqramının, BMT-nin İqtisadi və Sosial Şurası (ECOSOC) QHT bölməsinin xüsusi məşvərətçi statuslu üzvü olan BAMF Azərbaycan Mətbuat Şurasının, Azərbaycan Milli Qeyri-Hökumət Təşkilatları Forumu və Azərbaycan Jurnalistlər Konfederasiyasının üzvüdür.
Hazırda Azərbaycanda Beynəlxalq Avrasiya Mətbuat Fondu qədər geniş spektrə malik ikinci QHT yoxdur. Hətta fəaliyyətində, ortaya qoyduğu layihələrə nəzər salsaq, dünyanın bir çox regional və mərkəzi QHT-ləri ilə çiyin-çiyinə yürüməyi bacaran və müqayisəyə gələn bir təşkilatdır.
Bu gün təşkilatın fəaliyyət sahəsi günü-gündən genişlənir, bu da beynəlxalq müstəvidə söz demək imkanlarını və Azərbaycan haqqında məlumatları geniş auditoriyaya yaymaq imkanı verir. Qeyd etmək lazımdır ki, Azərbaycan adına atılan bu addımların, uğurlu fəaliyyətin memarı fondun prezidenti Umud Mirzəyevdir.
Dostlarının və qurumun yaradılmasına şahidlik edən insanların xatirələrindən oxuyuruq ki, təşkilat yeni yaranan zamanda ilk fəaliyyətini Umud Mirzəyevin şəxsi evindən başlayıb. O, bütün işlərini buradan idarə etməkdən əlavə təşəbbüsü ilə Azərbaycana gələn xarici jurnalistlərə nümayəndələrə evinin qapısını açıb, onları orada qonaqlayıb. Bu gün BAMF-ın var olması həmin bu çətinliklərdən yoğrulan güclü iradənin nəticəsidir.
Təşkilat Beynəlxalq Mətbuat İnstitutunun tərəfdaşı kimi bu nüfuzlu qurumun hər il keçirdiyi Dünya Konqreslərində və Baş Assambleyalarında iştirak edir, təkliflər irəli sürür.
Azərbaycanda mətbuat işinin, ictimaii rəyin formalaşmasında xüsusi rolu olan BAMF media və vətəndaş cəmiyyətinin inkişafı sahəsində indiyədək xeyli uğurlu işlər görmüş, respublikanın aparıcı media qurumlarının və kütləvi informasiya vasitələri nümayəndələrinin iştirak etdiyi tədbirlər, təlimlər həyata keçirib.
MEDİA SAHƏSİNƏ YÜRÜTDÜYÜ SİYASƏTİN ANA XƏTTİ
BAMF üçün Qarabağ problemi, Ermənistanın Azərbaycana qarşı apardığı işğalçı siyasəti bütün layihə və tədbirlərində qırmızı xətti olub. Qurum münaqişə başlanan zamandan indiyə qədər bu mühüm missiyasını layiqincə həyata keçirib. Umud Mirzəyevin təşəbbüsü ilə xarici jurnalistlər, nümayəndələr, tələbələr dəfələrlə münaqişə zonasına səfər ediblər, onlara ermənilərin azərbaycanlıları öz ata ocaqlarından didərgin etmələri, yaşatdıqları faciələr haqqında həqiqətlər bütün çılpaqlıqları ilə çatdırılıb. Bu isə Azərbaycan həqiqətlərini dünyaya çatdırılmasında mühüm rol oynayıb. Dəfələrlə xarici mətbuatda Azərbaycan haqqında çap olunan məlumatlar bunun bariz nümunəsidir.
BAMF və QARABAĞ...
BAMF Qarabağ regionu ilə bağlı bir çox layihələrə imza atıb.
Burada “Əl-Cəzirə” telekanalı ilə BAMF-ın birgə proyekti olan Azərbaycanın bölgələri haqqında çəkilən tanıtım verilişlərinin adını çəkmək yerinə düşər. Fondun fəaliyyəti haqqında danışanda Beynəlxalq Mina Təmizləmə Agentliyi (ANAMA) ilə əməkdaşlıq edərək, minadan çirklənən torpaqları düşmən tələsindən təmizlənməsi əməliyyatlarında fəal iştirak etməsinə də nəzər salmaq yetərli olar.
BAMF Sülhməramlı aksiyalar, konfliktologiya və insan haqlarının müdafiəsi sahəsində də səmərəli işləri görüb. Azərbaycanda qaçqınların və məcburi köçkünlərin problemlərinin həlli, miqrasiya məsələlərinin öyrənilməsi və icmanın inkişafı sahəsində də Beynəlxalq Avrasiya Mətbuat Fondunun öz imzası var.
Fond öz fəaliyyətində Azərbaycanda humanitar yardımdan inkişafa doğru keçildiyi bir dövrdə qaçqınların və məcburi köçkünlərin özlərinin gəlir gətirən sahələrinin yaradılmasına da xüsusi diqqət yetirən BAMF icma problemlərinin həllini, ev-eşiklərindən didərgin düşmüş soydaşlar arasında sahibkarlıq bacarıqlarının inkişaf etdirilməsi məqsədilə layihələr həyata keçirilməsini də hər zaman ön plana salıb.
Bu gün BAMF-ın Tərtər, Füzuli və Ağstafa rayonlarında regional ofisləri fəaliyyət göstərir. Qurum yeni layihələrə imza atmaqda davam edir.
Fikirlərimi Beynəlxalq Avrasiya Mətbuat Fondunun yeni ofislərinin Xankəndidə, Xocalıda açılmağı arzusu ilə bitirmək istədim. Bu, məncə Böyük Zəfərdə öz payı olan BAMF və onun prezidenti Umud Mirzəyev üçün də ən vacib amallardan biridir. Çünki təməl günlərindən fəaliyyətini vətəndaş cəmiyyətinin formalaşmasına, inteqrasiya məsələlərinə həsr etmiş bir təşkilat bunu haqq edən ən birinci qurumlardandır.
30 yaşımız mübarək, əziz BAMF ailəmiz!