Son dönəmlərdə ictimai nəqliyyatdan xeyli şikayətlər var. Bu narazılıqlar içində isə ən aktualı sürücülərin qeyri-etik və təhlükəli davranışlarıdır. Bir müddət əvvəl sosial şəbəkələrdə film izləyə-izləyə sükan arxasında əyləşən sürücünün yayılan görüntüləri isə bu halların mütəmadi olaraq təkrarlanmasına eyham vurur. 71 saylı marşrutun sürücüsü bu təhlükəli hərəkətinə görə BNA tərəfindən sərt xəbərdarlıq alıb.
Lakin görünən odur ki, edilən xəbərdarlıqlara baxmayaraq, bu cür hallar (sükan arxasında telefonla danışan, siqaret çəkən və.s) mütəmadi olaraq təkrarlanır.
Ümumiyyətlə ictimai nəqliyyatı idarə edən sürücülər seçim turundan hansı kriteriyalar əsasında keçirlər?
Məsələ ilə bağlı Ednews-a danışan “Xaliq Faiqoğlu” daşıyıcı şirkətinin mətbuat xidmətinin rəhbəri Nizam Rzayev bildirib ki, onlar bu vəzifəyə ancaq peşəkar sürücüləri cəlb edirlər.
“Müvafiq olaraq 25-55 yaşlı, “D” və ya “DE” sürücülük kateqoriyası olan, 3 ildən artıq iş təcrübəsi olan, əvvəllər ağır cinayətlərə görə məhkum edilməmiş, fiziki və psixoloji cəhətdən sağlam şəxslər avtobus sürücüsü vəzifəsi üzrə vakansiyalarla bağlı şirkətə müraciət edə bilir”.
N.Rzayev həmçinin bildirib ki, şirkətin istismarında olan avtobusların hər birində çoxsaylı müşahidə kameraları var.
“Şirkətimizdə xüsusi olaraq Mərkəzi Müşahidə Sistemi quraşdırılıb. Biz şirkət olaraq, sürücülərimizin bütün hərəkətlərini nəzarətdə saxlayırıq”.
Nəzərə alsaq ki, avtobuslarda bu kimi neqativ hadisələr çox vaxt sərnişinlər tərəfindən videoya çəkilərək ictimailəşdirilir. Bəs, marşrutlarda kamera nəzarəti olduğu halda hansı səbəbdən sürücüyə anında xəbərdarlıq edilmir?
“Məsələ ilə bağlı nəqliyyat eksperti Elməddin Muradlı açıqlamasında bildirib ki, bu cür məsuliyyətsiz sürücülərlə qarşılaşmağımız üzücüdür.
“Onların başının üzərində kamera nəzarəti olduğu halda qaydalara əməl etmirlər. Kameralara ciddi nəzarət edilmir. Bu ciddi problemdir. Təklif edirəm ki, avtobuslarda quraşdırılan kameralar hər şirkətin öz bazası ilə yanaşı, həm də mərkəzi bazaya inteqrasiya olunsun. Orada da ciddi nəzarət həyata keçirilsin. Əgər vətəndaş bu görüntünü çəkib paylaşmasaydı, heç kəsin bu hadisədən xəbəri olmayacaqdı. Həmin şirkət də bu hadisəni ictimailəşdirməyəcəkdi. Heç bir şirkət öz sürücüsünün videosunun yayılmasını istəməz. Vətəndaşlara təşəkkür etməliyik ki, bu kimi hadisələri üzə çıxarıb ictimailəşdirirlər. Bu görüntülərlə bağlı ciddi tədbir görülməli, bu şirkətlərin qarşısında məsələ qaldırmaq lazımdır”.
Ekspert həmçinin bildirir ki, bütün avtobuslar kameralarla təchiz olunmalıdır. Bu kameralar şirkətlərlə yanaşı vahid mərkəzdən idarə olunmalıdır.
Ayan Rzayeva
