Havaların kəskin dəyişməsi zamanı taksi qiymətlərinin 2 dəfə artması haqqında qeyd etmişdik. 

Tariflərin bu dərəcədə yüksəlməsi haqqında Rabitə və Yüksək Texnologiyalar Nazirliyinə göndərdiyimiz sorğuya mətbuat katibi Pərvanə Əliyeva, Ednews-a açıqlaması zamanı bildirib ki, qiymətlər qurum tərəfindən tənzimlənmir. 

 “Taksi minik avtomobilləri ilə daşımalarda tariflər dövlət tərəfindən tənzimlənmir.

Daşıma qiyməti tələb və təklif əsasında tərəflərin qarşılıqlı razılığı ilə müəyyən olunur. Hazırda qiymətlər fəaliyyət göstərən taksi operatorları tərəfindən kəskin rəqabət şəraitində formalaşır”.

Mətbuat katibi bu sahədə bəzi daşıyıcılar tərəfindən edilən sui-istifadə hallarından da danışıb.

“Avtomobil nəqliyyatı ilə kommersiya məqsədli daşımaların liberallaşdırılması, daşıyıcılara daha əlverişli şəraitin yaradılması məqsədilə “Lisenziyalaşdırma sahəsində bəzi tədbirlər haqqında” Azərbaycan Respublikası Prezidentinin 2015-ci il 21 dekabr tarixli 713 nömrəli Fərmanına əsasən avtomobil nəqliyyatı ilə sərnişin və yük daşımalarına lisenziya alınması tələbi ləğv edilib. Sahibkarlar üçün belə əlverişli şəraitin yaradılması müvafiq sahədə təklif bolluğu yaradıb, əhalinin məşğulluğuna müsbət təsir edib. Amma bəzi daşıyıcılar tərəfindən mövcud şəraitdən sui-istifadə hallarına yol verilir, mövcud qanunvericiliyin tələblərinə riayət edilmir, həmçinin xidmət keyfiyyəti aşağı düşür”. 

Sonda Pərvanə Əliyevə qeyd edib ki, qiymət eyni alqoritmlər əsasında  tələbata və günün pik vaxtlarına görə dəyişə bilir.

“Bu gün taksi daşımalarında önəmli paya sahib olan və dünyanın əksər ölkələrində onlayn platformada fəaliyyət göstərən aqreqator şirkətlər ölkədən asılı olmayaraq eyni proqram təminatından istifadə edirlər. Qiymət eyni alqoritmlər əsasında  tələbata və günün pik vaxtlarına görə dəyişə bilir”.

Rəna Mürşüd