Son zamanlarda apteklərdə yoxa çıxan dərmanların siyahısına daha birinin uşaqlar üçün hərarət salan "Nurofen" siropunun da adı daxil olub. Belə ki, valideynlər əsasən azyaşlılar üçün istifadə olunan bu dərmanı tapmaqda çətinlik çəkdiklərini deyirlər.
Hətta aptek işçiləri də bu dərman çatışmazlığını bildirir. Daha çox bu mövsümdə artan soyuqdəymə hallarında lazım olan "Nurofen" uzun müddətdir ki, apteklərdə tapılmır.
Məsələ ilə bağlı həkim Adil Qeybulla Ednews-a bildirib ki, son zamanlar dərman bazarında xeyli problemlər yaşanıb.
“Bu dərman çatışmazlığı ilə yanaşı keyfiyyət parametrləri ilə bağlıdır. Vətəndaşlar bu şikayətlərində yetərincə haqlıdırlar. Azərbaycan, əsasən dərmanları Ukrayna Rusiya və Belarusiyadan idxal edir. Onların bir hissəsini də Gürcüstan İran və Avropa ölkələrindən idxal edir. Ukrayna-Rusiya müharibəsi nəticəsində Ukraynanın əczaçılıq sənayesinin infrakstrukturu dağıdılıb. Ölkə humanitar yardım hesabına yaşayır. Ona görə də ölkədə apteklərdə bəzi dərmanlar tapılmır. Təkcə Nurofen yox , o cümlədən bir çox gündəlik təlabat olan dərmanlarda da çatışmazlıq yaranır. Məsələ artıq ciddi vəziyyət alıb. Biz dərman idxalı ilə strategiyanı yenidən qurmalıyıq. Bu hala qədər də ən yaxşı dərman istehsalının olduğu ölkə Türkiyədir”.
O həmçinin qeyd edib ki, Türkiyənin dərman sənayesi kifayət qədər yüksək keyfiyyət parametrlərinə səhibdir. Bu həm keyfiyyətli, həm də sərfəli olacaq.
Ayan Rzayeva