2022-ci olsa da, hələ də paytaxtda köhnə olmasına baxmayaraq istismar olunan avtobuslara rast gəlirik. Daha çox qəsəbə və kəndlərdə təsadüf olunan bu cür ictimai nəqliyyat vasitələri istər tutumu baxımından, istərsə də texniki baxımdan sərişinləri narahat edir.
Bəs, onların bu halda istismar olunması düzgündür mü? Ümumilikdə ölkəmizdə ictimai nəqliyyat vasitələrinin utilizasiyası mövcuddur?
Məsələ ilə bağlı Ednews-a danışan nəqliyyat sahəsi üzrə ekspert Eldəniz Cəfərov hazırda nəinki paytaxtın, qəsəbə və kəndlərində, həmçinin Azərbaycanın digər şəhərlərində belə müasir təhlükəsizlik tələblərinə cavab verməyən avtobusların istismarda olduğuna şahid olduğumuzu bildirib:
"Belə halda olan ictimai nəqliyyat vasitələrinin utilizasiyası haqqında hələlik hər hansı bir məsələ yoxdur. Çox təəssüf ki, bugün daşıyıcı şirkətlər öz qazanclarını daha çox artırmaq məqsədilə, iqtisadi maraqlarını düşünərək sərnişin daşımada müasir tələblərə cavab verən avtobuslardan istifadə etmirlər".
Ekspert həmçinin xəttlərə buraxılan avtobusların vəziyyətindən hər kəsin xəbərdar olduğunu da vurğulayıb:
"Yaxşı olardı ki, yaxın vaxtlarda həmin avtobusların dəyişdirilməsi ilə bağlı əməli addımlar atılsın. Elə bunun vasitəsilə də, vətəndaşların təhlükəsiz daşınması həyata keçirilə bilər".
E. Cəfərov həmin nəqliyyat vasitələrinin utilizasiya dövrünə qədərki mərhələsi ilə bağlı da danışıb.
"Belə nəqliyyat vasitələrinin utilizasiya qədərki dövründə müvafiq qurumlar daşıyıcılar qarşısında tələb qoymaldırlar. Bu tələb köhnə avtobusların yeniləri ilə əvəz olunması ilə əlaqəli olmalıdır. Amma çox təəssüflər olsun ki, biz bununla bağlı heç bir irəliləyiş görmürük".
Nəzrin Beydiyeva