Xəbər verdiyimiz kimi, bu gün Azərbaycan xalqının ümummilli lideri Heydər Əliyevin vəfatının ildönümüdür. Ulu öndərin vəfatından 19 il ötür.
Ednews Heydər Əliyevlə bağlı deputat və politoloqların fikirlərini öyrənib.
Millət vəkili Ceyhun Məmmədov:
“Ulu Öndərin müdrik siyasəti nəticəsində Azərbaycan, sözün əsl mənasında, müstəqil dövlətə çevrilmişdir. Azərbaycan xalqı haqlı olaraq Heydər Əliyevi Azərbaycan dövlət müstəqilliyinin qurucusu kimi qəbul edir. Onun rəhbərliyi altında dövlətçiliyin əsasları qoyuldu və ciddi islahatlara start verildi.
Bu gün dünyada təxminən 3000-4000 arası xalq, 200-ə yaxın dövlət var. Biz xoşbəxtik ki, bizim müstəqil və güclü dövlətimiz var. Unutmamalıyıq ki, dünyada ciddi proseslər gedir. Hazırda üzərimizə düşən əlimizdəki əvəzsiz nemətlərin - müstəqilliyin, suverenliyin, istiqrarın və sabitliyin dəyərini bilməkdir. Hesab edirəm, burada ən çox məsuliyyət həm də gənclərindir. Gələcəyin idarəçiləri onlardır. Ölkəmizin gələcəyi onlardan çox asılıdır.
Bu gün hamımız Ulu Öndər Heydər Əliyevin amallarına sadiq qalaraq Prezident İlham Əliyevin ətrafında sıx birləşməli, müstəqilliyimizi və qələbəmizi daha da möhkəmləndirməliyik. Ulu Öndərin ən böyük arzusu Azərbaycan xalqını müstəqil, qalib, torpaqlarımızı işğaldan azad edilmiş görmək idi. Azərbaycan xalqı Ulu Öndərin Dövlətimizin müstəqilliyi və suverenliyi uğrunda fədakarlığını heç zaman unutmayacaq. Xalqımızın taleyində və müstəqil Azərbaycan Respublikasının tarixində silinməz izlər qoymuş Ulu Öndər Heydər Əliyevi dərin ehtiram və rəhmətlə anırıq!"
Müasir Müsavat Partiyasının sədri Hafiz Hacıyev:
“Ulu öndər Heydər Əliyev Azərbaycanın bu günə gəlib çıxmağında, müstəqilliyin möhkəmləndirilməsində, daimi olmasında çox böyük işləri olub. Bu gün sevindirdi haldır ki, müstəqillyimizin banisi Heydər Əliyevdir. Bu yolu davam etdirən də cənab prezidentimiz İlham Əliyevdir.
Heydər Əliyev SSRİ-də vəzifədən uzaqlaşdırıldıqdan sonra onun Moskvadakı evində olmuşam. Onunla birlikdə həmin evdə ilk dəfə mən qalmışam. O zaman balıqçılıq sənayesində çalışırdım. Həmin gün “Nezavismaya Qazeta”nın rəhbərliyini evə dəvət edib, rəhmətlikdən böyük bir müsahibə aldırmışam. Həmin qəzeti 300 nüsxəsini təyyarə ilə Azərbaycana gətirəndə o vaxtkı DTK-nın sədri Hüseyn Hüseynov məni tutdurub. Sonra məni Ayaz Mütəllibovun qəbuluna gətirdilər. Ayaz Mütəllibova hadisəni təfərrüatı ilə başa saldım. O da məni sərbəst buraxdı.
Heydər Əliyevin yenidən hakimiyyətə qayıtmasını təmin edənlərdən biri mən olmuşam. Onun Bakıya qayıtması zamanı məni hava limanında döydülər. Hələ də gözümün altındakı şiş qalıb. Heydər Əliyev Bakıya qayıdanda onu Cəlal Əliyev, Nəriman Həsənzadə və mən qarşıladıq. Eyni zamanda, rəhmətlik Moskvadan Bakıya qayıdanda onu ilk dəfə qarşılayan və gül dəstəsi verən Müasir Müsavat Partiyasının bugünkü sədri, yəni mən oldum”.
Oğuz Ayvaz
