Millət vəkili Zahid Oruc doğulan qız uşaqlarına görə sosial müavinətin verilməsini təklif edib. O, öz fikirlərini statistikaya görə, oğlan uşaqlarının sayının çoxalması, demoqrafik natarazlığın qarşısının alınması ilə əlaqələndirib. Həmçinin bu qız uşaqlarının abort olunmasının qarşısını müəyyən dərəcədə ala bilər.
Maraqlıdır, bu cür yanaşma gələcəkdə qız uşaqlarının oğlanlardan sayca daha çox olmasına gətirib çıxarsa gendər bərabərsizliyinə yol aça bilər?
Məsələnin aktuallığını nəzərə alıb, mövzunu ictimaiyyət xadimləri ilə müzakirə etdik. İlk müraciət etdiyimiz deputat Fazil Mustafa oldu. O, öz fikirlərini Ednews-a şərh edib.
“Fikrimcə, bu maraqlı təklifdir. Burada əsasən subyektiv abortlar məsələsinə nəzər salmaq lazımdır. Abortların sayının artmasına görə də sərt cəza tədbirləri tətbiq etmək lazımdır. Əsas çıxış yollarından biri budur. Təklif əslində nə qədər faydalı olsa da, eyni zamanda problemlər də yarada bilər”.
Onun sözlərinə görə vəziyyət faciəvi hal alsa, bu üsuldan da istifadə etmək mümkündür.
“İndiki vəziyyətdə bunun qarşısını almaq üçün tədbirlər görmək lazımdır. Qız övladlarını istəməyən valideynlər ilə həm maarifçilik tədbirləri aparılmalı, həm də onlara hüquqi məhdudiyyətlər qoyulmalıdır. Nəzərə almaq lazımdır ki, qızların sayı çoxalması da düzgün deyil. Gender bərabərliyini qorumaq lazımdır”.
Sosioloq Lalə Mehralı Ednews-a açıqlamasında bildirib ki, bu çox yaxşı təklifdir, amma bu valideynlər arasında fikir ayrılığı yarada bilər.
“Təklif edərdim ki, sosial müavinətlərin verilməsi təkcə qız uşaqları üçün nəzərdə tutulmasın. Bu təklifin işləmə mexanizmini fərqli formada etsələr daha yaxşı olar”.
Sosioloqun fikrincə müavinətin yalnız qızlara verilməsi gələcəkdə gender bərabərsizliyinə gətirib çıxara bilər. Onun sözlərinə görə problemin həlli üçün yeganə çıxış yolu selebral abortların qadağan olunmasıdır.
“Abortların sayının aşağı olması üçün təkcə bu yolla mübarizə aparılmamalıdır. Bizim qanunvericilikdə bu abort məsələləri ilə bağlı cəzalar olduqca zəifdir. Bu cəzalar ciddi şəkildə sərtləşdirilməlidir. Əvvəllər həkimlər uşağın cinsiyyətinin deyilməsi prosesini çox ləngidirdilər. Hətta altıncı aya qədər valideynə cinsiyyət haqqında məlumat vermirdilər. Bu çox gözəl bir addım idi. Həmin mərhələdə artıq abort etmək mümkün olmurdu. Bu gün həkimlər artıq 11-ci həftədə dölün cinsiyyəti bəlli olan kimi valideynə məlumat verirlər. Bu məsələdə cəza mexanizminin tərəfdarıyam. Həkimlər də burada cəzalandırılmalıdırlar”.
O, həmçinin qeyd edib ki, belə bir qanunun qüvvəyə minməsi bəzi mənfəət güdən ailələrin vəziyyətdən istifadə edə bilməsinə də gətirib çıxardacaq.
“Düşünürəm ki, bu haldan bir çox insanlar sui istifadə edə bilər. Çünki ancaq qızlar üçün socsal müavinət təyin olunsa, bir çox valideynlər uşağa qazanc mənbəyi kimi baxacaq. Bu da uşağı normal həyat tərzindən məhrum edə bilər”.
Ayan Rzayeva