Yeni il yaxınlaşdıqca, şəhər əhalisi bayramı keçirmək üçün əsasən rayonlara üz tutur. Lakin bu gün regionlara işləyən qatarlar fəaliyyətsizdir. Pandemiya dövründən işləməyən qatarlar Bakı – Gəncə qatarı istisna olmaqla hələ də eyni durumdadır.
Maraqlıdır artıq iki ilə yaxındır ki, bağlı qalan dəmiryolları bu bayram günlərində açılacaqmı?
“Azərbaycan Dəmir Yolları” QSC-dən Ednews-a bildirilib ki, bütün strukturları 31 Dekabr – Dünya Azərbaycanlılarının Həmrəyliyi Günü və Yeni il bayramı ilə əlaqədar gücləndirilmiş iş rejimində çalışacaq.
“Bayram günləri ilə əlaqədar Bakı-Gəncə-Bakı istiqamətində artan sərnişin tələbatını nəzərə alaraq əlavə qatarlar xəttə buraxılacaq. Qatarlar Bakıdan dekabrın 30-da saat 19:00-da, dekabrın 31-də saat 09:00- da, yanvarın 3-də saat 19:00-da, Gəncədən isə dekabr 31-də saat 09:00-da və saat 14:30-da, yanvarın 4-də isə saat 09:00-da yola düşəcək. Qeyd edək ki, Bakı-Gəncə-Bakı sürətli sərnişin qatarının cari qrafikində heç bir dəyişiklik edilmir. Qrafik üzrə hər gün saat 08:45-də Bakıdan yola düşən qatar saat 12:25-də Gəncəyə, Gəncədən isə saat 18:00-da yola düşən qatar saat 21:35-də Bakıya çatır”.
Qurumdan bildirilib ki, Bakı-Sumqayıt-Bakı elektrik qatarları isə bayram günlərində qeyri-iş günlərindəki qrafikə uyğun hərəkətdə olacaq.
“Dəmir yolu nəqliyyatı hərəkətin müntəzəmliyi ilə fərqlənən nəqliyyat vasitəsidir və sərnişinlər bu nəqliyyat növü ilə mənzil başına daha tez, rahat və təhlükəsiz şəraitdə çatırlar. Növbəti ildə potensial sərnişin tələbatı olan istiqamətlər üzrə qatarların bərpası məsələsinə baxılacaq”.
Göründüyü kimi Azərbaycan Dəmir Yollarının qrafikində heç bir dəyişiklik yoxdur. Digər regionlara gedən qatarlar bu bayramda fəaliyyətlərini bərpa etməyəcəklər. Rayonlara üz tutanlar isə hələ də tıxaclarda qalmağa məhkum olacaqlar.
Ayan Rzayeva