Əməlin xarakterindən və ictimai təhlükəsizlik dərəcəsindən asılı olaraq, ictimai qayda və ictimai təhlükəsizlik əleyhinə törədilən əməllərə görə inzibati və ya cinayət məsuliiyəti nəzərdə tutula bilərmi?
Ednews-a danışan vəkil Tural Həsənlinin sözlərinə görə, İnzibati Xətalar Məcəlləsinin 12.2-bəndinə əsasən inzibati məsuliyyət o halda yaranır ki, bu əməllər cinayət məsuliyyətinə səbəb olmasın.
“İstər ictimai qaydanın qorunması, istərsə də ictimai təhlükəsizliyin və ictimai asayişin təmin edilməsi ilə bağlı əsas vəzifələr hüquq-mühafizə orqanlarının üzərinə düşür. Eləcə də qanunverilicilikdə ictimai qaydanın qorunması və ictimai təhlükəsizliyin təmin edilməsində vətəndaşların iştirakını istisna edən hal yoxdur. Əksinə həm Azərbaycan Respublikasının Konstitusiyası, həm də digər qanunverilcilik aktlarına istinadən, ictimai qaydanın qorunması və ictimai təhlükəsizliyin təminində hər bir vətəndaşın iştirak etmək hüququ vardır. Yəni qanunvericilik məcbur etmir, vətəndaşa hüquq verir.
Lakin qeyd edilən hallarla yanaşı, bəzən həm vətəndaşların müraciəti, həm də kütləvi informasiya vasitələrində yayımlanan hadisələrə əsaslanaraq demək istəyirəm ki, bəzən bu sahədə qanunvericilikdə hər hansı məsuliyyət nəzərdə tutulmayan əməllərə görə vətəndaşların narahat edilməsi və ya onlara hər hansı məhdudlaşdırmanın tətbiq edilməsi sonda həmin şəxslərin haqlı narazılığna səbəb olur.”
Vəkil həmçinin onu da qeyd etdi ki, cəmiyyətdə əxlaq normaları ilə nizamlanan qaydalar da mövcuddur. Lakin istənilən əxlaq normasının pozulması buna görə həmişə məsuliyyət tədbirinin tətbiq olunmasını istisna edir.
“Başqa cür desək, bu sahədə olan istənilən pozuntuya görə məsuliyyət nəzərdə tutulmur. Buna misal olaraq bir çox halları sadalamaq olar. Düzdür əxlaqi baxımdan, ətrafdakı şəxslərə münasibətdə alqışlanmayan hal kimi qiymətləndirilsə də, həmin hərəkəti törədən şəxsə qarşı hər hansı məsuliyyət tətbiq edilmə mənasına gəlmir”.
Həsənli sonda onu da bildirdi ki, hər kəs bir peşənin sahibidir və hər kəs aid olduğu peşə üzrə müəyyən bilik və bacarıqlara malikdir. Bəzən şəxsin ümumi biliyinin kifayət qədər olmaması onun ziyanına həll olunması ilə nəticələnir.
Aynurə İsmayılqızı
