Bu gün 20 Yanvar faciəsindən 33 il ötür. 1990-cı ilin bu günü Sovet əsgərləri azadlıq və demokratiya uğrunda mübarizə aparan Azərbaycan xalqının əzmini qırmaq üçün paytaxt Bakı da daxil olmaqla, bir neçə şəhərə qoşun yeridib, etiraz edən silahsız əhaliyə qarşı qırğınlar törədiblər.
Faciənin beynəlxalq səviyyədə tanınması və qiymətləndirilməsi üçün Azərbaycan dövləti və ictimaiyyəti mühüm addımlar atır. Hər il dünyanın bir çox ölkəsində faciə qurbanlarının xatirəsi yad edilir, 20 Yanvar həqiqətləri ictimaiyyətə çatdırılır.
İraq-Azərbaycan Dostluq Cəmiyyətinin sədri, Bağdad Strateji Araşdırmalar Mərkəzinin direktoru professor Mutəz Muhi Əbdül Həmid Ednews-a açıqlamasında bildirib ki, 20 Yanvar faciəsi insanlıq tarixində törədilmiş ən böyük qətliamlardan biridir:
“Faciə qurbanlarının xatirəsini ehtiramla anırıq. Bu hadisə həm də Azərbaycan xalqının müstəqillik uğrunda apardığı mübarizəni simvolizə edir. Biz 20 Yanvar həqiqətlərini dünya ictimaiyyətinə çatdırmalıyıq. İraq, ümumiyyətlə, ərəb mətbuatı, xəbər saytları bu tarixi günlə bağlı yazılar dərc edir, məqalələr yayımlayırlar. Ümumiyyətlə, son illərdə ərəb mediası Azərbaycan tarixində baş vermiş önəmli hadisələr haqqında yazmağa xüsusi səy göstərir. Düşünürəm ki, bunun səbəbi Azərbaycanla ərəb-islam dünyası arasında artan ikitərəfli əlaqələrdir".
O əlavə edib ki, İraq mediası 2020-ci ilin Vətən müharibəsində Azərbaycanın Ermənistan üzərindəki qələbəsini və ermənilərin tarixi torpaqlarımızı 30 il müddətində işğal altında saxlaması faktını da ərəb dünyasına çatdırmaq üçün səylərini əsirgəmir:
“20 yanvar qırğınları ilə yanaşı, 1992-ci il fevralın 26-da ermənilərin dinc əhaliyə qarşı törətdiyi Xocalı qətliamı haqqında da ərəb dünyası məlumatlıdır. Tarixi Qarabağ torpaqlarının erməni işğalından azad edilməsi uğrunda gedən 44 günlük müharibədə Azərbaycanın qazandığı qələbə münasibətilə mühüm məqalələr dərc olunmuşdu. İraq ictimaiyyəti və ziyalılar, jurnalistlər bu qələbəni hər kəsə duyurmaq üçün əllərindən gələni edirdilər".
2023-cü ilin "Heydər Əliyev" ili elan olunmasına da toxunan iraqlı professor bu əlamətdar tarixin il boyu müxtəlif tədbirlərlə qeyd olunacağını vurğuladı:
"Azərbaycan xalqının ümumillii lideri Heydər Əliyevin anadan olmasından 100 il ötür. Növbəti aylarda bu ölməz şəxsiyyətin 100 illiyini qeyd edəcəyik, bununla bağlı simpoziumlar, görüşlərimiz olacaq. İraq-Azərbaycan Dostluq Cəmiyyəti olaraq biz də bu münasibətlə və digər önəmli hadisələrlə bağlı yazılar dərc etməklə ərəb ictimaiyyətini və İslam dünyasını məlumatlandıracağıq".
O, Azərbaycanın mədəniyyət paytaxtı olan Şuşa şəhərinin İslam dünyasında oynadığı mühüm rola da diqqət çəkib:
"Ötən il Qarabağın incisi Şuşa şəhəri Azərbaycanın mədəniyyət paytaxtı seçildi. Bu münasibətlə nəşr etdiyimiz və bu qədim şəhərin tarixindən bəhs edən kitabımız İraqda və Azərbaycanda böyük marağa səbəb oldu. Şuşa öz mədəniyyəti, milli və dini irsi baxımından çox zəngin bir yerdir. Buna görə də təkcə Azərbaycan deyil, bütün İslam dünyası üçün önəmli rol oynayır".
Mutəz Muhi Əbdül Həmid onu da qeyd edib ki, İraq-Azərbaycan Dostluq Cəmiyyəti iki ölkə arasındakı mədəni əlaqələrin inkişafı üçün səy göstərir və bu məqsədlə fəaliyyətini uğurla davam etdirəcək.
Törə Zeynallı
