Beşdən artıq övlada sahib olan qadınlara sosial müavinətin aylıq məbləği 105 manat müəyyən edilib.
Təyin olunan məbləğ sosial şəbəkələrdə böyük müzakirələrə səbəb olub. Belə ki, bir çoxları 105 manatın hər bir uşağın tibii və sosial problemlərinin qarşılanması üçün kifayət etmədiyini bildirib.
Məsələ ilə bağlı Ednews-a danışan iqtisadçı ekspert Natiq Cəfərov qeyd edib ki, aylıq sosial müavinətin 105 manat dəyərində təyin edilməsi müəyyən dərəcədə uşaqlara maddi dəstək olacaq.
“Tutaq ki, beş uşağı olan ailədə hər bir uşağa aylıq 105 manat düşürsə, bu cəmi 525 manat edir. Bu məbləğ ümumi olaraq bütün uşaqların zəruri ehtiyaclarının qarşılanmasına müəyyən qədər müsbət təsir göstərə bilər. Ancaq Nazirlər Kabinetinə suallar ünvanlamaq lazımdır ki, 105 manat dəyərində olan aylıq sosial müavinəti hansı indekatorlara əsasən hesablayıblar? Çünki nəzərə almaq lazımdır ki, 0 və 5 yaş arası uşaqların və daha böyük uşaqların xərclərinin qarşılanmasında fərqlər çoxdur. Məsələn 0 və 5 yaş arası körpələrin qidaları, dərmanları və digər ehtiyaclarını ödəyən məhsulları fərqli qiymətlərdə satılır. Eyni zamanda 5 yaşdan yuxarı olan uşaqların da ehtiyaclarını ödəyən məhsulların qiymətləri də fərqlidir. Uşaq böyüdükcə, onun ehtiyacları da durmadan artır”.
Ekspertin sözlərinə görə, hər bir uşağa düşən sosial müavinətin miqdarı yaşayış minimumu üçüm ödənilən məbləğin miqdarı ilə eyni səviyyədə olmalıdır.
“Hesab edirəm ki, indiki dövrdə çox uşaqlı ailələrdə hər bir uşağa heç olmasa təqribən 200-250 manat arası sosial müavinət ödənilməlidir. Məncə, bunun tətbiq edilməsi uşaqların sosial ehtiyaclarının qarşılanmasında daha məntiqli olardı”.
Qeyd edək ki, Azərbaycan Respublikasının Prezidenti İlham Əliyev “Beşdən çox uşağı olan qadınlara sosial müavinətin müəyyən edilməsi” haqqında 2013-cü il 27 dekabr tarixli 72 nömrəli Fərmanda dəyişikliklər edilməsi barədə yeni fərman imzalayıb.
Fərmana görə, beşdən çox uşağı olan qadınlara sosial müavinətin aylıq məbləği 2023-cü il yanvarın 1-dən hər uşaq üçün 105 manat təyin edilib.
Yunis Abdullayev
