Misirin Qahirə Universitetinin Ədəbiyyat fakültəsində Azərbaycan dilinin tədrisi davam edir.
Ednews xəbər verir ki, 250-ə yaxın tələbənin iştirak etdiyi dərsləri Misirdə Azərbaycan diasporu və Misir-Azərbaycan Dostluq Cəmiyyətinin sədri tədqiqatçı-alim Seymur Nəsirov tədris edir. Həmçinin əcnəbi tələbələr ölkəmizin zəngin mədəniyyəti, qədim tarixi, xalqımızın adət-ənənələri və Azərbaycan həqiqətləri ilə bağlı məlumatlandırılırlar.
Diaspor sədri S.Nəsirov bildirib ki, ölkəmizin Misirdə tanıdılması istiqamətində atılan addımlar uğurlu nəticələr verməkdədir. Belə ki, Qahirə Universitetində keçirilən dərslərlə yanaşı, Azərbaycan dilinə maraq göstərən əcnəbilər üçün diaspor mərkəzində əlavə olaraq dil kursları da təşkil edilib. Diaspor sədri qeyd edib ki, Misirdən və digər ölkələrdən olan gənclər arasında dilimizi yüksək səviyyədə mənimsəyənlərin sayı artmaqdadır. Hazırda diaspor mərkəzində dünyanın 41 ölkəsindən 450-ə yaxın tələbə Azərbaycan dili də daxil olmaqla, müxtəlif fənlər üzrə ödənişsiz təhsil alır.
Qeyd edək ki, Qahirə Universitetində Azərbaycan dilinin tədrisi Misir, İordaniya, İraq, Əlcəzair və digər ərəb ölkələrinin mətbuatı tərəfindən geniş şəkildə işıqlandırılıb.