Xətai rayonu, Neftçilər metrosu yaxınlığında tikinti zamanı ərazidə olan ağaclar “Giyaslı Group”şirkəti tərəfindən məhv edildiyi iddia olunur.
Bu barədə Ednews-a ətrafda yaşayan yerli sakinlər məlumat veriblər. Belə ki, ərazidə olan 61 saylı məktəbin yaxınlığında yerləşən 5 mərtəbəli köhnə bina sökülərək, şirkət tərəfindən hündürmərtəbəli bina inşa edilir. Lakin bu zaman tikintiyə mane olan, illərlə salınan yaşıllıq məhv edilib.
Tikinti zamanı ağacların məhv olması sakinlər tərəfindən lentə alınıb. Fotolardan da göründüyü kimi, inşaat gedən ərazidə çoxlu sayda ağaclar var. Ağacların bəziləri artıq kəsilib, yerdə qalanların taleyi qeyri-müəyyəndir. Həmin ərazidə 10-na yaxın ağac kəsildiyi iddia edilir. Hələ də sökülən binanın ətrafında onlarla ağac var.
Məsələ ilə bağlı tikinti aparan “Giyaslı Group” şirkətinin səlahiyyətli şəxsləri ilə əlaqə yaratmağa çalışdıq. Şirkətdən bildirildi ki, bu məlumatlar yalandır və orada heç bir qayda pozuntusuna yol verilməyib. Onlara əlimizdə görüntülərin olduğunu bildirdik də isə iddiaları təkzib etdilər.
Bununla bağlı Ekologiya və Təbii Sərvətlər Nazirliyinin mətbuat xidmətinin rəhbəri İradə İbrahimova Ednews-a açıqlamasında bildirib ki, hadisədən xəbərimiz var.
“İşçi qrupumuz sözügedən əraziyə göndəriləcək. Araşdırmalar aparılır”.
Məsələni diqqətdə saxlayacağıq.
Aysel Şahmar