Sığorta hadisəsi zamanı vətəndaşlar tibbi yardım almaq üçün xidmətlər zərfi çərçivəsində nəzərdə tutulan tibbi xidmətlərdən ödənişsiz istifadə hüququna malikdirlər. "Tibbi sığorta haqqında” Qanunun qəbul edilməsinə baxmayaraq, bəzi məqamlar vətəndaşlar arasında çaşqınlıq yaradır. Xüsusilə də, özəl tibb müəssisələrində icbari tibbi sığorta ilə xidmət göstərilməsi vətəndaşları maraqlandıran məqamlardandır.
Mövzu ilə bağlı Ednews-a danışan tibbi sığorta üzrə ekspert İlkin İbrahimov qeyd edib ki, icbari tibbi sığorta ilə bağlı xidmətlər zərfində göstərilən xidmətlərin növü və qiyməti həm TƏBİB-in tabeliyindəki müəssisələr, həm də özəl klinikalar üçün standartdır:
“Sığorta əsasında xidmət göstərən özəl klinikalar İcbari Tibbi Sığorta üzrə Dövlət Agentliyi ilə müqavilə bağlayır. Əksər özəl klinikalar bu məsələ ilə bağlı gözləmə mövqeyindədir. Hazırda, Agentliklə müqavilə bağlayan 115 özəl tibb müəssisəsi var. Özəl klinikalarda icbari tibbi sığorta yalnız xidmətlərə şamil edilir. Xəstə ambulator təcili və təxirəsalınmaz tibbi xidmətlərlə bağlı dərman vasitələri ilə təmin edilsə də, digər dərman preparatları qarşılanmır, həkim yalnız resept yaza bilər. Həmçinin, icbari tibbi sığortanın keçərli olduğu özəl xəstəxanalarda KT, MRT kimi cihazlarla müayinə də xidmətlər zərfində göstərildiyi qaydada, sayda və ödəniş müqabilində aparılır”.
Ekspert bildirib ki, icbari tibbi sığorta üzrə xidmət göstərən özəl klinikalara müraciət zamanı göstəriş mütləqdir:
“Əgər TƏBİB-in tabeliyindəki xəstəxanalarda lazımi xidmətlər göstərilmirsə və ya bu xidmətlərin göstərilməsi üçün lazımi şərait yoxdursa, xəstənin daha yaxın olduğu ərazi üzrə özəl klinikaya təxliyəsi üçün məlumat verilir. Burada mütləq həkim göstərişi olmalıdır. Xəstənin və ya yaxınlarının öz istəkləri ilə özəl klinikaya təxliyə mümkün deyil. Bəzi dövlət xəstəxanalarında mövcud olan şərait vətəndaşları qane etmir, xəstələrin müalicəsi lazımi qaydada aparılmır. Xəstəxana rəhbərliyi isə xəstənin icbari tibbi sığorta ilə özəl klinikaya nəqli üçün göstəriş vermir. Burada mübahisəli məqamlar ortaya çıxır. Bu məqamları araşdıracaq yuxarı instansiya elə İcbari Tibbi Sığorta üzrə Dövlət Agentliyinin özüdür. Agentliyin vəzifəsi hər xidmətə görə yalnız ödəniş etməkdir, o, tibbi xidmət göstərən orqan deyil. Sadə dillə desək, xidmət üzrə ödəniş edən qurumun mübahisəli məqamda dövlət xəstəxanasındakı faktiki şəraiti özünün araşdırması da paradoksdur. Nəyə görə pulu verən qurum həm də araşdıran tərəf olmalıdır?!”
Qeyd edək ki, qanunvericiliyə əsasən, vətəndaş göndəriş vərəqəsi almadan birbaşa özəl tibb müəssisəsinə müraciət etdiyi halda, göstərilən xidmətin dəyərini öz hesabına ödəməlidir. Eyni zamanda, təcili və təxirəsalınmaz tibbi yardım üçün göndəriş vərəqəsi olmadan birbaşa özəl xəstəxanalara müraciət də mümkündür. Bu halda tibbi xidmət icbari tibbi sığortaya daxildirsə, Agentlik onun dəyərini qarşılayır.
Törə Zeynallı