Son zamanlar paytaxt Bakıda baş verən silahlı insidentlər bəzi mülki vətəndaşların silah-sursatları haradan və necə əldə etmələri barədə müzakirələrə səbəb olub.

 

Bəzi ekspertlərin fikrincə, 44 gün davam edən İkinci Qarabağ müharibəsindən sonra  əldə olunan qənimət silahların müxtəlif insanların əlinə keçməsi qanunsuz şəkildə silah gəzdirmə hallarını artırıb. Atışma hallarının təkrarlanmasının qarşısını almaq üçün silah amnistiyası elanı təklif olunur.

 

Belə bir qanunun qəbul edilməsinə ehtiyac varmı?  

 

Məsələ ilə bağlı Ednews-a danışan deputat Arzu Nağıyev bildirib ki, 44 günlük müharibədən sonra savaşdan qayıdan qazilərin özlərilə silah gətirmələrinə dair hər hansı ciddi məlumat daxil olmayıb.

 

 

“Ümumiyyətlə, 44 günlük müharibədən sonra hansısa qənimətin, silah-sursatın savaş bölgələrindən gətirilməsi çətin məsələdir. O ərəfədə elə postlar qurulmuşdu ki, heç bir əsgər silah gətirmək marağında olmazdı. Ola bilər, hansısa kriminal qrupların əlinə müəyyən qədər silah keçib. Ancaq o demək deyil ki, həmin silah-sursat müharibə vaxt əldə olunub. Birinci Qarabağ müharibəsi vaxtı rayonlarımız işğal olunanda əhaliyə silah paylanmışdı. Sonradan silahı olanlar onları xüsusi xidmət və hüquq-mühafizə orqanlarına könüllü təhvil verirdilər.  Ancaq 44 günlük müharibədən sonra savaşdan qayıdan qazilərimizin silah gətirmələrinə dair hər hansı ciddi məlumat daxil olmayıb. Təbii ki, burada söhbət avtomat, pulemyot və digər silahlardan gedir. Atəş açılan hər bir silahın haradan gəldiyini yalnız ekspertizadan sonra aydınlaşdırmaq olar. Dediklərimə əsaslanıb hansısa amnistiya elan edilməli olduğunu düşünmürəm. Odlu silahla cinayət törədən şəxs tutulmalı, törətdiyi cinayətdən başqa, qanunsuz silah gəzdirdiyinə görə də əlavə maddə ilə məsuliyyətə cəlb olunmalıdır”.  

 

Hərbi ekspert Ədalət Verdiyev də silah amnistiyası ilə bağlı səsləndirilən fikirlərin əksini iddia edir:

 

“Hesab edirəm ki, son zamanlar paytaxtda baş verən insidentlərin qarşısını almaqçün silah amnistiyası elan etmək fayda verməyəcək. Qanunla nəzərdə tutulmuş kateqoriyada silah paylamaq daha təhlükəli nəticələrə gətirib çıxara bilər. Silah amnistiyası üçün real şərait olduğunu düşünmürəm. Belə bir qanunun qəbul ediləcəyini də gözləmirəm. Ən doğru yol ictimai qınaq və nəzarətdir. Silah gəzdirən insanlara ictimai nəzarət daha həlledici nəticələr verə bilər”. 

 

 

Ə.Verdiyev pul qarşılığında silahların təhvil verilməsinə də münasibət bildirib:

 

“Ödəniş müqabilində silahların şəxslərdən geri alınmasına gəldiksə isə, bəlkə də bu üsul müəyyən qədər effekt verə bilər. Lakin bu barədə qanunvericiliyə müəyyən dəyişikliklər olunmalıdır və bu prosesin yerinə yetirilmə mexanizmi işlənib hazırlanmalıdır. Qanunsuz silah gəzdirmənin müharibədən sonra artması iddialarını isə müvafiq güc strukturları araşdırmalıdır. Əlimizdə bu barədə statistika olmadığı üçün nəsə deyə bilmərik. Yenə də, son günlər baş verən silahlı qarşıdurmalar bu məsələni diqqətdə saxlamağı tələb edir”.

 

 

Törə Zeynallı