Son günlərdə sərçələrin sayının azaldığı müşahidə olunur. Maraqlıdır ki, bu quşların şəhərdə az görünməsinə səbəb nədi? Bu həyəcan siqnalı ola bilərmi?
Bu barədə Ednews-a danışan Azərbaycan Milli Elmlər Akademiyasının Quru Onurğalıları Laboratoriyasının aparıcı elmi işçisi, biologiya üzrə elmlər doktoru Tahir Kərimov bildirib ki, 20 il bundan əvvəl Bakının faunasında tamamilə fərqli quşlar var idi. Şəhərlərin siması dəyişdikcə floristik tərkibi də dəyişir.
“Tropik ağaclara daha çox üstünlük verilir. Urbanizasiya prossesi gedir. Tikililərin sayı artması və bitkilərin sayının azalması buna ciddi təsir göstərən amillərdəndir. Bitkilərin sayının azalması da buna ciddi təsir göstərir. Sərçələr əslində çöl quşlarıdır. Bakıda onlar üçün əlverişli olan yer zeytun bağlarıdır. Bu canlılar üçün yalnız iki faktor əsasdır. Birincisi, nəsil vermək üçün yerlərin olmamasıdır. İkincisi isə quşların qida problemidir. İndi təəssüf ki, şəhərlərdə son zamanlar evlərin dam örtüklərində metal konstruksiyalardan daha çox istifadə edilməsi yuvalama yerlərini məhdudlaşdırır”.
Mütəxəssisin fikrincə metal dam örtükləri istidən çox qızdığından, bu, quşların dəmir konstruksiyalı örtüklərin altında və üzərində yuva qurmağı çətin olur. Sərçələrin yoxa çıxması əslində onların şəhərlərdən başqa yerlərə köçməsi ilə əlaqəlidir”.
O, qeyd edib ki, sərçələrin sayının azalmasına yuvalama yerlərinin sıradan çıxması, qidasının kəskin azalması, şəhər mühitinin ab-havası, boz qarğanın bu quşların yumurtalarını, körpə balalarını məhv etməsi, pişiklərin hücumuna məruz qalmaları və s. öz təsirini göstərir.
Ayan Rzayeva
