Fazil Mustafaya qarşı törədilən sui-qəsd aktı deputatların, dövlət rəsmilərinin təhlükəsizliyi məsələsini gündəmə gətirib. Qanunvericiliyə əsasən, deputatlarınn təhlükəsizliyini təmin etmək məqsədi ilə onlara qanunla müəyyən edilmiş qaydada xidməti silah verilə bilər.
Bəs, deputatlar təhlükəsizlik məqsədilə silah gəzdirilməsinə ehtiyac görürmü?
Bu barədə Ednews-a açıqlama verən Zahid Oruc bildirib ki, dövlət rəsmilərinin xüsusi mühafizəsinə dair müəyyən qanunvericilik aktları, real texniki təminatlar var və praktiki olaraq da həyata keçirilir.
“Lakin hesab edirəm ki, baş verən son hadisəyə daha təmkinli cavab verməliyik. Silahdan istifadə xüsusi təcrübə və hazırlıq tələb edir. Bütün deputatlarımızın bunu bacardığını deyə bilmərik. Silah gəzdirmək də təhlükəsizliyə 100 faizlik zəmanət vermir. Heç birimizin canı, qanı Kəlbəcərdə, Laçında sərhədlərimizin bütövlüyünü qoruyan igidlərimizdən artıq deyil. Vaxtilə parlamentarilərimizin silah gəzdirdiyi günlərdə belə mən bundan imtina etmişəm. Bizi qoruyan xalqımız və dövlətimizdir. Əlbəttə, siyasi mübarizə özü də bir səngərdir, özünəməxsus təhlükələri var”.
Deputat bildirib ki, terror hadisələrinin qarşısını almaq üçün cəmiyyətdə sülhün, rifahın, əmin-amanlığın qorunması ən effektiv yoldur:
“Necə ki, 90-ci illərdə əhali arasında silah gəzdirmənin yayğın olduğu bir dövrdə ulu öndər Heydər Əliyev müxtəlif inzibati, sosial, siyasi tədbirlərlə silahlanmanın qarşısını aldı, eləcə də indi, eyni siyasət yürüdülməlidir. Hesab edirəm ki, həmkarım Fazil Mustafaya qarşı törədilən sui-qəsd terrordur və bunun siyasi motivləri var. Təşkilatçıların məqsədi şəxsi konflikt zəminində mübarizə aparmaq deyil, hədəf cəmiyyətimiz və dövlətimizdir . Bizi məqsədlərimizdən çəkindirməyə çalışırlar. Lakin Prezident İlham Əliyevin də dünən dediyi kimi, heç kim bizimlə ultimatum dili ilə danışa bilməz”.
Deputat Naqif Həmzəyev də məsələ ilə bağlı fikirlərini bölüşüb. O qeyd edib ki, deputatların silah gəzdirməsi problemdən çıxış yolu deyil:
“Fazil Mustafaya qarşı törədilən sui-qəsd planlaşdırılmış cinayətdir. Qanun deputatların silah gəzdirməsinə icazə verir. Lakin düşünürəm ki, bizi xalq seçib, biz onların içindəyik, kimdən qorumalıyıq özümüzü?! Cinayətkarları isə hüquq-mühafizə orqanları müəyyənləşdirib, baş verə biləcək hadisələrin qarşısını almalıdır. Bizlərin silah gəzdirməsi bu problemin həlli deyil. Təəssüflər olsun ki, dövlətimizi sevməyən qüvvələr var. Onlara qarşı da bizim xüsusi xidmət orqanlarımız lazımi əməliyyatları həyata keçirirlər. Lakin, bəzən belə hadisələrin qarşısını vaxtında almaq olmur. Düşünürəm ki, dünənki hadisənin təkrarlanmaması üçün təhlükəsizlik tədbirləri bundan sonra daha sistemli şəkildə həyata keçiriləcək.
Deputatların silah gəzdirməsinə isə mən ehtiyac görmürəm. Baş verən hadisəni qınayıram. Bu tək Fazil Mustafaya qarşı törədilmiş cinayət deyil, ölkəmizə yönəlmiş təxribatdır”.
Törə Zeynal
