Misirin nüfuzlu "Əlvafd" qəzetində Misir-Azərbaycan Dostluq Cəmiyyətinin və Misirdə Azərbaycan diasporunun sədri, tədqiqatçı-alim Seymur Nəsirovun geniş müsahibəsi dərc olunub.
Tədqiqatçı-alim Misirlə Azərbaycan arasında tarixi, mədəni və siyasi əlaqələrdən danışıb. O diqqətə çatdırıb ki, Azərbaycanda çoxlu sayda ərəb adını daşıyan kəndlərin olması xalqlarımız arasında tarixi əlaqələrin bariz nümunələrindən biridir.
Son illərdə iki ölkə arasında əlaqələrin daha da inkişaf etdiyini qeyd edən S.Nəsirov bildirib ki, bu ilin yanvarında Misir Prezidenti Əbdülfəttah Əs-Sisinin Azərbaycana səfəri bu əlaqələrin daha da inkişafına böyük töhfə verib.
S.Nəsirov bildirib ki, Azərbaycan müxtəlif sivilizasiyaların qovuşduğu məkan olaraq, əsrlərboyu milli-mədəni rəngarənglik mühitinin formalaşdığı, ayrı-ayrı millətlərin və konfessiyaların nümayəndələrinin sülh, əmin-amanlıq, qarşılıqlı anlaşma və dialoq şəraitində yaşadığı ölkə kimi tanınır. Azərbaycanın sadəcə bu gün deyil, qədimdən çoxsaylı xalqların firavan şəkildə yaşadığı ərazi olduğuna diqqət çəkən alim əlavə edib ki, ölkəmizdə tolerantlıq mühiti hər zaman ən yüksək səviyyədə olub. Burada multikulturalizmə, millətlər və dinlər arasında olan münasibətlərə, dialoqa həsr edilmiş beynəlxalq səviyyəli bir çox tədbirlər keçirilir.
Sonda Misir-Azərbaycan Dostluq Cəmiyyətinin fəaliyyətindən söhbət açan Seymur Nəsirov bildirib ki, burada Azərbaycan dili ilə yanaşı, xəttatlıq, ərəb dili və ədəbiyyatı, “Qurani-Kərim”in qiraətləri və digər fənlər üzrə kurslarda 42 ölkədən 450-ə yaxın tələbə ödənişsiz təhsil alır.
