Qadın peyğəmbərlərin olması barədə açıqlamasında ilahiyyatçı Elşad Miri deyib ki, 124 min peyğəmbərdən yəni biri də qadın olmayıb? Təbii ki, olub, lakin bu gün bəzi məşhur din xadimlərinin Qurandakı ayələri insanlara yanlış tərcümə etməsi insanlarda belə düşüncələrin yaranmasına səbəb olub.
Mövzu ilə bağlı Ednews-a münasibət bildirən ilahiyyatçı Tural İrfan bildirib ki, İslam dinində qadınların rolu və əhəmiyyəti böyükdür. Müqəddəs Quranda qadına böyük ehtiram var. Bir neçə qadından bəhs edilir, ya adı çəkilir, ya adına surə var, ya da üstünlüyündən bəhs edilir. İlk insan olan, eyni zamanda ilk peyğəmbər olan Həzrət Adəmin həyat yoldaşı Həvva xanım haqqında, Fironun həyat yoldaşı Asiyə xatun haqqında, Həzrət Fatimə haqqında ayələr var, Həzrət Məryəmin adına surə var. Allah ona vəhy etdiyini qeyd edir:
“Peyğəmbərlik bir missiyadır. Özü də çox çətin missiyadır. Allah bu ağır yükü incə, həssas varlıq olan qadına yükləməməklə qadını kişidən üstün tutmuşdur. Peyğəmbərlərə insanlar ağır işgəncələr verib, onları təhqir ediblər, həbs ediblər, bəzən qətlə yetiriblər və. s. Allah qadını bu ağır missiya ilə üz üzə qoymamışdır. Qadınlardan peyğəmbər olmaması qadının hüququnun kişidən aşağı olması demək deyil. Əksinə qadının ağır yük altına qoyulmamasıdır. Əksinə qadını üstün tutmaqdır. Həzrət Məryəm peyğəmbər olmasa da belə Allah ona vəhy etdiyini vurğulayır. Yəni, onunla danışdığını qeyd edir. Demək qadınlar peyğəmbər olmasa da belə peyğəmbərə xas olan üstünlüklərə malik olublar. Sanki onların rütbəsi olub, ancaq vəzifəsi olmayıb. Çünki vəzifə məsuliyyətdir. Allah qadınları bu ağır məsuliyyətdən azad edib”.
İlahiyyatçının sözlərinə görə, bəziləri Quran ayələrini hərfi mənada yozurlar, əsrlər əvvəl yazılmış təsirləri görməzdən gəlirlər. Yaxud indiyəcən gəlib keçmiş filosofları, alimləri nadan hesab edib, guya özlərinin Quranı düzgün anladıqlarını sübut etməyə çalışırlar:
“Sanki 1400 ildir heç kəs Quranı düz anlamayıb, təkcə bu adamlar başa düşüblər. Bu çox gülüncdür. Quranda otuza yaxın peyğəmbərin adı çəkilir, haqqında bəhs olunur. Onlardan heç biri qadın deyil. Əgər qadın peyğəmbər olası olsa idi, ilk insan və ilk peyğəmbər olan Adəmin həyat yoldaşı Həvva olardı. Çünki məntiqlə bu belə olmalı idi. Qadın peyğəmbər olmasına ehtiyac olmayıb. Bu mövzuda təhrif olunmuş dini kitablara istinad etmək də yanlışdır. Yeganə təhrif olunmamış səmavi kitab Qurandır. Bunu elm də, din də sübut edir. Ona görə başqa mənbələrdə olan yanıldıcı fikirləri İslama qatmaq olmaz.
Peyğəmbərlik elə bir missiyadır ki, o vəzifədə vasilə olmamalıdır. Gecə-gündüz insanların qulluğunda olmalıdır peyğəmbər. Biz bu nümunəni peyğəmbərlərin hamısının həyatında görürük. Ancaq qadınlara məxsus müəyyən hallar var ki, o zaman onlar ibadət edə bilməzlər. Peyğəmbər ibadətdə insanalara rəhbərlik etməlidir. Həmin halda olan qadın peyğəmbər nə etməli idi? Deməli idi ki, camaat bir həftə gözləsin, ondan sonra namaza imamlıq edə biləcək? Hamiləlik, doğum zamanı, süd vermə dövründə qadın peyğəmbərin fəaliyyətində fasilə yaranmış olacaqdı. Qədim dövrlərdə qadına münasibət daha aşağı idi. Əgər qadın peyğəmbərin namusuna təcavüz etsəydilər, o qadının isməti ilə yanaşı peyğəmbərlik mənsəbi ləkələnərdi, qadının dəyəri, qiyməti daha da enərdi. Bir çox xüsuslar var ki, qadının peyğəmbər olmamasını labüd edir.
Peyğəmbərlər bəzən qoşuna başçılıq edib savaşa girməli olublar. Qadının qoşuna başçılıq etməsi, müharibə aparması qadının incə ruhuna, nəcibliyinə qabalıq, sərtlik qata bilərdi.
Qadınlara peyğəmbərlik verməməklə Allah təala onları böyük bir ağır yükdən azad etmiş, onları mələklərlə bərabər tutmuşdur. Çünki mələklərdən də peyğəmbər olmur”.
Oğuz
