Millət vəkili Etibar Əliyev Milli Məclisin Elm və təhsil komitəsinin iclasında deyib ki, ali məktəb dərsliklərinin çapına indiyə qədər vəsait ayrılmayıb. Təhsilin İnkişafı Fondu yaradılıb. Ali məktəblər bu fonda vəsait köçürür. Fond bu dərslikləri çap etməlidir. Tələbələr kitab çatışmazlığından əziyyət çəkir.
“Bildiyiniz kimi ölkədə çoxlu sayda tələbələr təhsil alır. Hər bir ixtisas üçün eyni vəsaitlər mümkün deyil. Nəzərə alınsa ki, tələbələr hər semestr 7-ə yaxın fənn keçirlər və bu fənnlərin hər biri üçün ayrıca dərs vəsaiti lazım olur”.
Bunu Ednews-a açıqlamasında təhsil eksperti Kamran Əsədov deyib.
Onun sözlərinə görə, mövcud halı nəzərə alındıqda tələbələrin sayına əsasən, kitabların azlığı onların bu halla qarşılaşmasına səbəb olur. Bütün dünyada ən vacib məsələlərdən biri ali məktəblərdə dərslik məsələsidir.
“Bu gün orta məktəblərdə dərs vəsaitlərinin elə də çatışmazlığı yoxdur. Onların səviyyəsinin necə olduğunu bilmirəm, amma ən azından orta məktəblərdə dərslik təminatı var. Amma ali məktəblərdə ümumiyyətlə dərs vəsaitlərinin, çatışmazlığı çox ciddi problemdir. Çünki gənc mütəxəssislər əsasən, ali məktəblərdə yetişir və nəzəri bilgiləri orada əldə edirlər. Onlarda bilgi çatışmazlığı gələcəkdə onların işlədikləri sahədə müxtəlif ixtisaslar üzrə axsamalara, keyfiyyətsizliyə gətirib çıxaracaq. Bu, bir ölkənin gələcəyini təhlükə altına atan çox ciddi starteji məsələdir”.
Ekspert qeyd edib ki, ümumi fənnlər var ki onlara ayrılan kitab vəsaitləri hamı üçün yetərli ola bilir.
“Həmin kitabları istənilən qədər çap ola bilər. Lakin spesifik fənnlər var ki, onların alıcı və oxucu kütləsi tam müəyyən olmadığı üçün bu problem mövcud olur. Hər bir Ali təhsil müəssəsinin minimum tələbə sayının 30% -həcmində kitabxana fondu olmalıdır. Həmin kitablar elektron variantda da ali təhsil müəssəsinin fondu yerləşdirilməlidir. Mövcud problemin aradan qaldırılması üçün bütün vəsaitlərin elektron variantı hazırlanmalıdır. Və tələbələr həmin linkləri endirib, onları elektron variantda və ya çap edərək oxuya bilərlər. Dərsliklərin çatışmazlığı problemi təkcə respublikamızda deyil bir çox ölkələrində yaşadığı qlobal problemlərdən biridir. Çox təəssüf ki, ölkəmizdə elektron kitabxanalar inkişaf etməyib və buda həmin problemin yaşanmasına səbəb olur”.
Aytac Həsənova
