Sosial şəbəkələrdə Sumqayıtda 7 yaşlı uşağın idman zalında aldığı xəsarət nəticəsində həyatını itirməsi ilə bağlı görüntülər böyük müzakirələrə səbəb olub. Cüdo məşqi zamanı məşqçinin uşağa qarşı amansızlıqla etdiyi hərəkətlər ictimaiyyət tərəfindən qəzəblə qarşılanıb. Hətta bəziləri məşqçiyə ömürlük həbs cəzası da tələb edilər.
Maraqlıdır, kimlər məşqçilik fəaliyyəti ilə məşğul ola bilər?
Mövzu ilə bağlı deputat Vüqar İsgəndərov Ednews-a açıqlamasında bildirib ki, hamı müəllim və yaxud məşqçi ola bilməz.
“Həmçinin, kimsə bir insanı kiçik yaşlarından hansısa balaca uşağa həm fiziki, həm də psixoloji yanaşmaları bilmədən dərs deyə bilməz. Mütləq məşqçi olmaq istəyən bir şəxs pedaqogikanı bilməlidir. Yanaşma tərzini bilməyən yalnız bir neçə fənd bilən idmançı müəllim ola bilməz”.
Deputat vurğulayıb ki, bu iş üzrə xüsusi orqanlar, əsasən, Gənclər və İdman Nazirliyi, idman federasiyları, klubları düzgün iş sistemi qurmalıdırlar.
“Asan sertifkat almaqla, hansısa federasiyanın üzvü olmaqla müəllim olmur. Yayılan görüntü başqa vaxtın görüntüsü olsa belə, məşqçinin uşaqla davranışı birmənalı olaraq göstərir. Belə məşq, tədris yolverilməzdir. Ona görə də bütün məşqçi müəllimlərin sertifkatları yoxlanılmalıdır. Monitorinqlər gücləndirilməlidir. Bütün bu sadalananlar üçün təcili addımlar atılmalıdır”.
Qeyd edək ki, faktla bağlı Sumqayıt şəhər prokurorluğunda Cinayət Məcəlləsinin 126.3-cü (qəsdən sağlamlığa ağır zərər vurma ehtiyatsızlıqdan zərərçəkmiş şəxsin ölümünə səbəb olduqda) maddəsi ilə cinayət işi başlanıb. Həmçinin, Azərbaycan Cüdo Federasiyasının (ACF) məsələ ilə bağlı açıqlamasında bildirilib ki, mətbuatda gedən xəbərlərdə məşqçi kimi adı çəkilən Mehman Xəlilov cüdo idman növü üzrə məşqçi deyildir. Belə ki, o, rəsmi olaraq başqa idman növü üzrə fəaliyyət göstərib və hadisənin baş verdiyi məşq də rəsmi olaraq digər idman növü üzrə keçirilib.
“ACF olaraq, məşq zamanı məşqçilərin müvafiq təhlükəsizlik prosedurlara riayət etmələrinə və idmançılarının təhlükəsizliyinin təmin olunmasına xüsusi önəm veririk. Cüdo məşqləri zamanı azyaşlı uşaqların üzərində mürəkkəb fəndlərin göstərilməsi qəti qadağandır. Həmçinin, məşqlərə yeni başlayan uşaqlara ilk növbədə təhlükəsiz yıxılmalar öyrədilir və yalnız bir neçə aydan sonra müvafiq sadə fəndlərin öyrədilməsinə başlanılır. Bütün bu məsələlərə Beynəlxalq Cüdo Federasiyasının Akademiyası ilə birlikdə təşkil edilən məşqçilik kurslarında və seminarlarda xüsusi diqqət yetirilir”. Sumqayıtda idman müəlliminin 7 yaşlı uşağa qarşı amansız davranışı bu gün Milli Məclisin keçirilən plenar iclasındada müzakirə edilib.
Aysel Şahmar
