Qahirədə Misir-Azərbaycan Dostluq Cəmiyyəti tərəfindən Azərbaycan xalqının Ümummilli Lideri Heydər Əliyevin 100 illiyinə həsr olunmuş tədbir keçirilib.
Ednews xəbər verir ki, tədbirdə Azərbaycanın Misirdəki səfirliyinin əməkdaşları, orada yaşayan və təhsil alan azərbaycanlılar, həmçinin onların ailə üzvləri, Misir-Azərbaycan Dostluq Cəmiyyətinin nümayəndələri və Azərbaycan dilini öyrənən xarici tələbələr iştirak edib.
Tədbir iştirakçılarını salamlayan Misir-Azərbaycan Dostluq Cəmiyyətinin sədri, tədqiqatçı-alim Seymur Nəsirov bildirib ki, bu günlərdə Azərbaycanın dahi siyasətçisi, ölkəni parçalanma və məhv olma təhlükəsindən xilas edərək inkişaf və əmin-amanlıq yoluna çıxaran Ümummilli Lider Heydər Əliyevin 100 illik yubileyi dünyanın müxtəlif ölkələrində qeyd edilir. O diqqətə çatdırıb ki, Azərbaycan Prezidenti İlham Əliyevin Sərəncamına əsasən, 2023-cü il ölkəmizdə “Heydər Əliyev İli” elan olunub. S.Nəsirov qeyd edib ki, Ulu Öndərin 100 illik yubileyi münasibətilə Dostluq Cəmiyyəti tərəfindən silsilə tədbirlər davam edəcək.
Sonra Azərbaycanın Misirdəki fövqəladə və səlahiyyətli səfiri Elxan Poluxov çıxış edərək bildirib ki, Misir Prezidenti Əbdülfəttah Əs-Sisinin 2023-cü ilin yanvar ayında Azərbaycana səfəri iki ölkə arasında münasibətlərin və əməkdaşlıq əlaqələrinin yüksək səviyyədə olmasının bariz nümunəsidir. O qeyd edib ki, iki ölkə arasında dostluq əlaqələri qədim tarixə söykənir və xalqlarımızı bir-birinə böyük hörmət və doğmalıq hissləri bağlayır. Səfir bütün sahələrdə hiss olunan inkişafın yaxın gələcəkdə daha da yüksələn xətlə davam edəcəyini vurğulayıb. E.Poluxov Azərbaycan diasporu tərəfindən keçirilən tədbirlərdə ölkəmizə dost münasibəti bəsləyən yerli ictimaiyyət nümayəndələrinin iştirak etməsini təqdirəlayiq hal kimi dəyərləndirib.
Tədbirdə çıxış edən Misir Ərəb Respublikası Ali Təhsil Nazirliyinin xarici əlaqələr üzrə baş direktoru İmam Bağdadi və Orta Asiya və Qafqaz məsələləri üzrə tədqiqatçı jurnalist Əhməd Əbdu Tarabek Ulu Öndərin Misirlə Azərbaycan arasında əlaqələrin inkişafında müstəsna xidmətləri olduğunu qeyd ediblər.
Tədbirin sonunda Dostluq Cəmiyyətinin xarici tələbələri Ulu Öndərə həsr edilmiş şeirlər söyləyiblər.
Qeyd edək ki, hazırda Misir-Azərbaycan Dostluq Cəmiyyətinin nəzdindəki kurslarda Azərbaycan dili ilə yanaşı, 42 ölkədən 450-yə yaxın gənc müxtəlif fənlər üzrə ödənişsiz təhsil alır.